Prexuicios. ¿Daveres son necesarios?

Nun tamos tan llibres de faltes y averíes. De pecaos, si vos plaz dicilo asina. L'home ye munches coses, pero sobremanera, animal de "pre-xuicios" y, poro, pre-xulga.

El prexuiciu parez dalgo necesario como ferramienta pa cuidase de lo que nun se conoz de mano. Pero ye tan eficaz alvertidor cuantu esfarrapaor d'esperiencies tamién necesaries. El prexuiciu nin ye bono nin malo, si ye que preferís utilizar esta vieya clave dicotómico. Como too na vida, el resultáu d'esta actitú (esi ye'l raigañu del prexuiciu) depende de lo qu'acompangue al fechu de prexulgar.

Supongo que, como cada home ye un mundu, si el prexuiciu nun va xunto cola sana crítica o con una intelixencia plástico, (aquella qu'arreblaga perriba lo aparente, diendo en cata de lo auténtico), l'home prexuiciosu ye animal peligroso, cimeramente, pa sigo mesmo. Nestos términos, el prexuiciu comportase como lo que ye, una piñera que fai lo propio pa dexar pasar a les entendederes del home prexuicioso solo aquéllo que va tar acordies col sistema paradigmático de creyencies que tien. Un home que va pel mundu con estos, digamos, antueyos colloreaos por prexuicios, ensin dulda va a tener una perspeutiva del mundu daqué distorsionao. Y ello, vuelvo a cabruñar el fierro, nin ye bono nin ye malo, namái una forma de pasar pela vida. Claro que, nestos términos, nun deberíemos aneciar pidiendo a la vida cosa dixebrao de lo que mos dea ya que nós, y solo nós, eleximos el menú que creyer.

Nesti cachu vidiu que vos punxi, que ye un montaxe personal del audiu d'otru vidiu, se fala del AMOR, con lletra mayúsculo. El vidiu trai pallabres que suenen bien, parecen sensates, y aporten con un sabor eclesial, ecuménicu si se prefier, en tou casu trescendente y prestoso al home espiritual. Son pallabres bonales,  enllenes de sabencia, humildá y humanidá. Son, insisto, prestoses d'oyer. Les imaxenes que les caltienen acompanguen perbién el mensaxe y, a nun ser qu'ún tea incómodu cola idea d'un ser supremu, totipotente y totiamorosu, tóo flúi razonablemente pacetible pa una mente común y relaxao.

Pero, darréu, póngovos el mesmu  mensaxe del vidiu orixinal, talo como lu atopé na televisión. Cuando se vea, nun tengo dulda dala de que más d'ún va a tener un prexuiciu que, de nun arreblagalu, fadrái incómodo el velu. Mas, por embargu, el  mensaxe ye'l mesmu, igual de sentenciosu y prestosu.

Va tiempu que los clásicos predicaron que lo importante nun ye'l mensaxeru, sinón el mensax. Que poco tendría d'importar si quien diz una verdá, o una falsedá, ye d'aspeutu sabiu o babayu, ricu o probe. Pero los PREXUICIOS son arma poderoso que, sinón la descargamos a tiempu, mos arreflundirán llueñe d'una esperiencia que podría mui bien ser prestoso, d'una información amañoso o, cenciellamente, tarazarán la oportunidá d'enanchar entendederes o humanidá, por exemplu.

Empleguemos los prexuicios con midida y pa lo que valen: pa dar el primer pasu n'inorancia sabiendo que, el segundu, tien que selo con conocencia. O, muncho meyor: prescindamos de los prexuicios.

Como diz Johannes Paulus II: "Nun tengais miéu. Nunca. Inxamás".