"Voi ser feliz", dixo aquel home...

Viviendo nesti mundu, nada sutil, ye normal esperar que la felicidá non descanse na sutileza. Mui a la escontra, esperamos que la felicidá venga del mundu, d'esa parte de la realidá que se vivi puertes afuera de la concencia que la conceutúa.

Dicímonos, cuala xaculatoria, que fadremos un esfuerzu y el mundu, poro, mos recompensará con coses, coses que mos trairán la felicidá y, amás, cuando venga esa felicidá mos cuidaremos de que dure porque nós, y solo nós, fadremos qu'ello sía asina.

L'aspirante a guerreru lo diz mui ufanu ensin decatase de que fala d'una felicidá por definir o, de definise, curtia. L'aspirante nun se decata de que, cuando ponemos fuera de nós el poder, ya nun somos dueños del nuesu destín y entós, ¿qué felicidá podremos algamar? Solo la que otros decidan en porgüeyu d'ellos, non de nosotros.

¿QVO VADIS?

Curiosa ecuación psicolóxico: Tentación, obsesión, adición

Dicin qu’Oscar Wilde dixo aquello de que lo meyor pa quitase una tentación ye cayer nella. La frase ye inxenioso, digna d’aplaudise coles oreyes, pero nun lo voi facer. Falamos de tentación cuando, de fecho, la cosa va de pilancu, torga o estorvisa. En resume, una imposibilidá d’exercer dalguna triba d’autonomía personal. Si vivimos despiertos, sabiendo les llendes en que nos mover, la mesma cosciencia esnicia cualquier raigañu psicolóxicu de tentación pues, pescanciando consecuencies y responsabilidaes, eleximos el camín amañoso pal desendolcu de la personalidá, de la vida, de la esistencia. Nesti marcu, la tentación nun ye otra cosa qu’una posibilidá más, ente les miles al algame, d’eleición.
Pero cuando la tentación encarna nel durmiyosu, la resistencia frente a los pilancos, torgues y estorvises esarreya la consecuente re-aición, dalgo qu’entama como puramente físico pa corporizar en psicolóxica cadena. Y eso pue llevar a la obsesión que, de nun pescanciase, muerre n’adición, ye dicir, esclavitú. Con otres pallabres lo cunten los guionistes de la serie MEDIUM, pero lo fondero del asunto ye igual. Si nun yes dueñu (despiertu) de la to persona, vas selo de los petites (irracionales o non) de la mesma. Cuestión d’información y llibertá. Veamos cómo lo punxeron n'imaxe . Que vos preste.

Pagar impuestos

Nestes feches de rendir cuentes al rei, el supuestu dueñu de los dineros fai mui poco por alministralos bien, sobremanera pensando que, el dineru del rei ye, bramente, de nueso. Son les nueses perres les que marafundien otros, sinón les furten descarao p'arriquecer como gochos esperando samartín. Esta reflexión que fain los actores de la serie "Me llamo Earl" ye prestoso. Impuestos, regalíes y pasapuertes. Nin sin ellos nin con ellos. Vaya comedia. Too na vida tien un preciu y quiciabes vivir nun mundu razonable desixa un preciu, tamién, razonable.

Acambar la cuyar o acambáse ún

Si fuésemos quien a resalvar l’escobiu de lo supuestamente evidente, lo racional o “real”, si pudiésemos ver más allá del ropaxe o los falampernios personales en que desendolca el yo camín del traxe maera, tol mundu podría ver esi otru cachu de la realidá que nun ye menos real qu’esti mecigayu pruyimientos y enfotos que forma la materia que vivimos, y que mos fai. Los llibros canalizaos de Seth son mui interesantes y amañosos pa derromper el paradigma de lo evidente, y d’ellos el más ilustrante ye “THE INDIVIDUAL AND MASS EVENTS”. Sicasí, mientres ún llee, o non, esti trabayu de Jane Roberts, la peli MATRIX apurre una idea simplayo de lo que ye trabayar la realidá. Los antiguos, que por selo nun yeren menos sabios, trabayaron alrodiu la engañifa de los sentíos y el conceuto de la realidá ontolóxico. Nós nun vamos metenos en fondures pero ye interesante ver cómo los medios informáticos y audiovisuales puen averanos un cachín de lo que podríemos “ver” y “facer” si fuéremos coscientes de la riqueza y puxo d’esa otra parte del “yo” qu’alguarda ser descubierta. Nel cachu peli, los hermanos Wachowski amuesen el trucu del abangamientu de cuyar. Si obviamos la parafernalia budhistoide, mui cierto ye que lo que se diz nesti cachín. masque pelín trompicao, ye mui cierto y plasmantemente cenciello de trabayar.

Interpretación ad-libitum de la peli MATRIX

¿Qué ye la matriz?

Nun dexa de ser irónico que la primer película que punxo la Televisión Autonómica Asturiana (TPA o TeleTini) cuando entamó a desendolcar una programación normal, foi MATRIX, de los hermanos Wachowski. Un acontecimientu como aquél, ensin dulda dala que pidía una película paradigmático de lo que diba ser, o ye, esa variante del facismu que ye la “realpolitik del PSOE n’Asturies. Una película na que se postula una esistencia virtual, na que la realidá del humanu ye ser una mera pila d’unos cuantos voltios qu’alimenten una supercadarma de máquines o, lo que sería lo mesmo dicir, mutans mutandi, una realidá, l’asturiana, na que la vida d’una Asturies puxante ye más virtual que otra cosa pues, perbaxo la brillantina y la capa pintura ta la sociedá real, toa calistrada pola corrupción sozialista qu’emplega maneres de la pelícua MATRIX pa que los ciudadanos durmientes nun s’enteren d’hasta qué puntu nun son dueños del so destín d’asturianos. Na película MATRIX los dueños del mundu, les máquines, usen la enerxía-informática pa mantener durmiyosos a los esclavos humanos que cultiven en campos de crianza. Na pelicula asturiana del PSOE, los malos usen les perres del presupuestu añal d’ingresos y gastos, qu’apreben los políticos, pa mantener tranquilos y sedados a los durmiyosos asturianos que vivin el sueñu de l’Asturies, Paraísu Natural.

Nun m’estraña gota que la primer película que punxera la TPA fuera MÁTRIX. En realidá nun yera otra cosa qu’un auto homenaxe descarao a la perpetuación del facismu psoero n’Asturuies.

La matriz ye control. Ye alienación. Ye corrupción.

Veamos un cachu de la película lliéndola y pescanciándola d’otra miente. Contemplemos al mocín de la película, Neo, fuxir de la policía político del PSOE, digamos corruptores de subvenciones y contratantes del sector públicu asturianu, tal vez xente d’Atroxaeros Pumariñu, o de Ligraphus, xente esmolecío por perder les sostancioses comisiones que garren viviendo nel mundu virtual del PSOE. Mientres el mozín cuerre pelos pasiellos d’una Asturies esbarrumbada, el desesperu ye muncho. Y ye cuando se decata de que vivi nuna borrina cuasietílico de mentires y corrupción cuando ve que la realida nun ye la que quieren vendé-y los corruptores sozialistos sinon otra mui dixebrada. Y ye entonces cuanto tien el puxu personal pa camudar les coses. Interesante película, sí. Da pa muncho.

¿L'home animal racional?

"Y daquién dixo: criemos al home a nuesa imaxe y semeyanza, pues otra meyor nun atopamos. Y seya eso que criamos dueño de besties, mares y camperes, qu'espurra per elles enllenu de gracia y harmonía..."
Luego los racionales dixeron "l''home ye animal racional..."
Los griegos del clasicismu clásicu "Antropos zoo politikón..." l'home ye animal políticu.
Yo digo que ye animal social, de corripia gochos....

Pero na peli LA MATRIZ se define al home polo que ye: una enfermedá pa esti (porque tovía nun atopó otros) planeta. Voi ver d'iguar el problema de sincronización pero'l mensaxe auditivu val abondo.