El sitiu Asturies.com tien la sentencia del TC, y mientres dure l'enllaz equí podréis lleela .
Diz el sitiu ASTURIES.COM:"La sentencia del Tribunal Constitucional que refuga’l recursu d’inconstitucionalidá de la modificación del Reglamentu de la Xunta Xeneral presentáu por VOX yá ye pública. L’órganu avala l’usu del asturianu na Cámara al reducise al ámbitu propiu del Parllamentu y nun obligar a tolos poderes públicos de l’autonomía.
Cándido Conde-Pumpido foi’l maxistráu que s’encargó de redautar una sentencia qu’algamó l’apoyu de la gran mayoría del Plenu, cola oposición única de Encarnación Roca y un votu particular concurrente –ta d’alcuerdu cola decisión, pero non argumentación– de Pedro González-Trevijano. En total participaron nueve persones na valoración del recursu d’inconstitucionalidá.
El dictame “señala que’l preceptu reglamentariu impugnáu nun tien como resultáu l’atribución de los efeutos propios de la oficialidá a una llingua propia como mediu normal de comunicación énte tolos poderes públicos asitiaos nel territoriu autonómicu ‘sinón únicamente reconoz determinaos efeutos nel senu de la institución parllamentaria autonómica’. N’otres pallabres, l’usu del bable/asturianu nun se reconoz nin a l’Alministración autonómica, nin a los entes llocales, nin a los órganos dependientes de l’Alministración central, porque sólo queda circunscritu al ámbitu de la propia Cámara autonómica”, esplica nuna nota’l tribunal.
Sobre la falta d’oficialidá qu’apuntaben los denunciantes p’alegar la inconstitucionalidá del Reglamentu, la sentencia razona que “el que nun s’atribuyera estatutariamente calter oficial al bable/asturianu nun esclúi la posibilidá de tutelar aquella realidá llingüística que nun ta amparada pol estatutu de la oficialidá llingüística per aciu de midíes de proteición y promoción como ye’l reconocimientu del usu de la llingua propia énte l’órganu de representación de la ciudadanía, la Xunta del Principáu d’Asturies, foru de debate y participación nel que ye especialmente afayadizu que se garantice y visibilice aquella realidá lingüística plural”. En definitiva, na midida en que l’Estatutu d’Autonomía “protexe y ampara” l’asturianu, los maxistraos entienden que “nun hai dulda de que resultan d’aplicación les disposiciones de la Carta Europea de les Llingües Rexonales o Minoritaries”.
Los votos particulares
Roca presentó un votu particular al entender que “namái l’Estatutu pue convertir una llingua propia en mediu normal de comunicación en y ente los poderes públicos. Y si nun lo fai, el llexislador nun pue conferir, aunque sía de forma parcial o limitada, dicha cualidá”. Mentes, González-Trevijano, que fixo un votu particular concurrente, cuida que se “debería precisar que la posibilidá d’usar el bable/asturianu yelo a los esclusivos efeutos d’abrir l’usu d’esa llingua en sede parllamentaria, pero ensin que de dicha utilización se pueda deducir validez o efeutu xurídicu dalgún, nin pueda derivarse na so configuración como llingua vehicular”, esplica’l tribunal na nota, y echa en falta una interpretación qu’asegure “l’equilibriu ente la posibilidá d’utilizar esta modalidá lingüística y el derechu de los parllamentarios al exerciciu de les sos funciones ensin obstáculu dalgún deriváu del desconocimientu d’esta llingua”.
Amen.
