Xixón dende l'aire, 2011, vuelta a Asturies

Prestome ver Xixón dende l'aire.

La matriz ye....

La matriz (matrix, en latin) fue una película mui celebrao. Con independencia de gustos, púnxo n'imaxe conceutos que, d'otra forma, diben ser difíciles de caltriar Si sustituimos el mundu virtual qu'espeya la película, basau en programación informático de códigu binariu, polo que ye'l mundu que vivimos, un programa "real" basao en sucesos cuánticos y, poro, estocásticos, la llectura ye satamente igual. Espurriré nello más alantre pero agora citalo permíteme xubir esti cachín de la peli.

Guerreru Pacetible. Si nun tas al cuidu, pierdes y te pierdes

Vivir el presente ye más fácil de dicir que de facer. La mayoría de la xente, la mayor parte del tiempu, nun necesita vivir el presente. De fecho, vivir el presente pué ser incómodo si nun desconectes d'enfotos y pesares. La comodidá ta nel pasáu onde, paradóxicamente, nada podemos facer, y lo ye porque ye tarrén conocío que nun asusta. Los enfotos tan nel futuru, sitiu borrinoso que nun esiste más allá del llocu maxín que cabalga a les sos deleres.

Y mientres refocilamos nún, o notru, la vida pasa callandino cabo nós, amosando una variedá y una información valoratible que perdemos pola mor de tar durmiendo el sueñu de los distrayíos. Asina lo diz Nick Nolte cuando-y respuende al guah.e.

L'aspirante a guerreru acaba salir del regatu en que calló por aciu arreflundiu culebreru del gasolineru Nick Nolte, que lu arreflundió p'allá fácilmente, ensin trabayu nin cansera. Esto maravía al mozu, que-y entruga cómo lo fexo...

Una bona aición.

¿Qué ye una bona aición? Apelando a la tópica, toos conocemos, o deberíemos saber que, xusticia y derechu, raramente concasen. El mal esiste. Tamién los malos. Si babayu ye’l que fai babayaes sigún Forrest Gump, malu ye’l que fai malures. Y cuando enfrentamos el mal ¿qué facer?

Cuando tas al otru lláu de la raya de la vida, sabes perbién qué, y qué non, facer. Pero nun tando nesi sitiu, convién evitalo, sinón combatilu, guardando siempres, eso sí, la integridá personal. Nesta situación podemos entrugamos si un mal pué, o debe, iguase produciendo otru mal, o por aciu d'otru mal. Eso lleva a la vengación, a la llei del talión: güeyu por güeyu, lo que nun dexa de ser una mena de xusticia primitivo pero ye evidente que tan imperfeuto como lo somos los humanos, y ello porque ye difícil conceutuar como malo una aición que pué producir un bien o, polo menos, iguar lo iguable.

El campu de la malura da pa muncho. Les implicaciones étiques o morales dan pa llarga parola. Poro, propóngovos que visionéis comigu esti cachu de la serie televisivo norteamericano “Medium”. Con independencia de creyer o non la forma de la historia, la sostancia ye lo interesante. Aprovecho la ocasión pa dicir que ye mui cierto lo del más allá, pero tala esperiencia ye personal y, poro, intrasferiblemente suxetivo. Veamos, sicasí, cómo un presuntu mal pue iguar una situación que, de sigo, diba camín de ser pior.

Nun somos islles.

Hai unes feches dicía-y a una amiga que nun somos islles.

Ye evidente que somos, amás d’animales, eso mesmo pero con más alxetivos. Somos animales emocionales, más que racionales, y tamién sociales, más que gregarios anque, viendo a les mases d’oveyes nos campos de fumbol duldo, seriamente, que l’home nun sía animal de corripia. Pero vaigamos colo de la islla.

Una islla ye imaxe de soledá por antonomasia. Arrodiada d’agua perdayuri, considerando’l planu bidimensional, ye conceutu de solitú, que si ye por situación buscada arrementes, val dicir d’introspeción o meditación.

Ser una islla nun ye cosa malo, si movenos na tópica del conocimientu. Necesitamos, de xemes en cuando, un espaciu de reflexión, de meditación, de desconexión del baturiciu de la realidá cotidiano qu’afuega el conocimientu d’otres realidaes, tanto internes como esternes. Si empatamos islla con soledá cosciente, ello namái va traer beneficios en salú y entendimientu. Enanchará entendederes y podrá acancallar al corazón buiciegu.

A vueltes, la islla ye imaxe de proteición. Abellugamientu. Refuxu en llúriga comeniente cuando un mal amenaza o un mal afecta. Ye sitiu amañoso en qu’encarnar les firides, guarir d’espantos o maldaes. Ye sitiu en que la soledá, amás de melecina espiritual, ye necesidá de proteición físico.

La islla, tamién, ye imaxe d’autosuficiencia. Ella sola, metanes el mediu que l’arrodia, caltién la propia identidá y singularidá cola testeronía de la so sola esistencia. Nesi sen, toos somos islles. Sicasí, ye imaxe engañoso. L’autosuficiencia de la islla ye más aparente que real pues tolo que l’arrodia-y apurre coses que la islla nun tien. El mar, solménala con salmoria y resclavos de toa mena; el sol, apúrre-y la radiación que, de tener suelu vexetal en que trabayar, posibilitará la vida fotosintético. Y el cielu, llorará agua si cuadren los vientos o les estaciones metereolóxiques. Una islla pué sentise sola pero tá más acompangada de lo que crée.

Bien. Eso ye una islla, nel sen metafórico y nel real. L’amiga tendría de pescanciar que nun somos islles, polo menos, siempre. Tamos arrodiaos de xente y de la política que cría esa xente. Hai sentimientos y emociones que mos fain, dacuando, bendítamente vulnerables. Munchos son los que nun saben que, dafechu, ente les islles humanes hai muchu tresporte, munchu barcu y avión. Hai más comunicación de la que parez.

Otra cosa ye quere ser una islla en cuanto a nun mos relacionar con daquién o daqué. Si la voluntá ye vivir solu yo nun falo d’islla. Falo de dalguna malura, de dalgún procesu patolóxicu del que guarir con tiempu pues sentise solu nun ye tar solu sinón nun poder ser a ver lo bono que mos arrodia. Y eso, tamién, ye llibertá.

Veamos dalgo de la soledá y la tristura que trai ésta, nestes imáxenes de la serie Grey's Anatomy

Inda l'escesu tien midida...pa dalgunes.

Vivir el presente inclui, ta claro, tolo que'l presente da. Ún de les enerxíes más potentes y prestoses, amás d'anovadora de la vida, ye'l sexu. Nel marcu de la llibertá ente amantes, nun hai estorvisa o pilancu más allá de la imaxinación de los implicaos. Pero ye evidente que los llímites son personales. Un comportamientu "depredador" nun parez femenino pero lo cierto ye que nel mundu de los sentimientos y hormones, el xueu sexual da pa muncho. Esti cachu de la serie "Sex & the city" amuesa cómo, siendo una de les protagonistes l'arquetipu de muyer mui  echá p'alantre, otra viendrá que bobina te fadrá.

Living "la Vida lloco..."

Quiciabes esti blog tendría de llamase daqué asina como, "viviendo la vida en presente". Pero ya que nun ye esi el nome, voi tirar d'un cachu de la serie Kalifornication que me prestó muncho. Nél, énte la solicitú esplícito de xaréu sexual d'una moza, el nenu diz que non. Ta bien nun tener el celebru nos calzones o, si se prefier, respetar alcuerdos y responsabilidaes. Pero nun ye de la mesma cuerda el maliguáu que va na silla elléctrico quien, sabiamente, asegura que ye meyor aprovechar les oportunidaes énte la perspeutiva de vese nuna posición na que ello sería imposible. Ambes postures son éticamente impecables. Yo prefiero "living la vida lloco", pero solo depués de cumplir el restu de compromisos, lo cualo, a vueltes, ye probe consuelu de carne pero eleváu ésitu d'espíritu. Hai xente pa too.

El "guerreru pacetible", entama dir a clase

Puesto que punxi un cachín de la película “El guerreru pacetible”, con Nick Nolte, una collacia entrugóme que cómo diba la esperiencia de vaciar la menta al guah.e y que, como quedaron pa practicalo nun parque, que cómo diba a acabar l’aición. Bono, nun me cuesta trabayo poner el cachu. Amás, me permite comentalo.

La película “El guerreru pacetible” ye’l típicu productu norteamericano derivao de la “californian niu eich”, un interesante film iniciáticu que, polo menos, tien la virtú de dicir coses obvies con un curiau llinguaxe que bebi de fontes de la llamada, filosofía oriental. Aceutando que’l mundu ocidental vivi “de puertes p’afuera” y que l’oriental postula “vivir pa dientro”, nun lleva xera pescanciar que la película, como otres de la mesma cuerda, cabruña un mesmu fierru: l’autodescubrimientu. Nesi sen, l’autor del llibru que vieno a película y a sistema comercial d’autosuperación y mercadotecnia,, Dan Millman, resume, mui al gustu norteamericano lo que, con otres pallabres y más poesía, espurre en filosofíes tales como’l budhismu, el taoismu y otres especializaciones espirituales de raigañu intimista. ¿Y eso ye malo? Non. Ye una forma amañosa de presentar verdaes válides pa cualquier tiempu, llugar y home. Podríemos discutir la sistemática y l’aplicación, pero non la eficacia de siguir el camín del guerreru pacetible, que val dicir, el Tao, el mesmu camín de la vida pues, dafechu, la vida ye camín y el camín ye aquélla.

Nesti cachu peli, el guah.e, que ye un bon deportista, y tien vida propio de mozacu con ésitu social, recibe la lleición de cómo se-y vacia la mente cuando enfrenta un socesu inesperáu. Eso llévalu a lo que se conoz como, “vivir el presente” lo cualo ye imprescindible si ún quier ser dueñu del so destín vital.

Vivi el presente. Nun tienes otru tiempu nes tos manes.

Rendición y llimpieza de mente

Quiero compartir con vosotros una información. Trátase d’un conocíu, home bien portáu y sabiu, non sabicheru, de más p’allá la raya oriental. Un bon profesional del comerciu que vieno a estes tierres cuala tolina perdía qu’enroncha en sablera salmorioso, camín de la otra vida. Un cáncer nel sistema dixestivu lu tien atoxigáu nesi ínterin ente lo deseyable y lo ineludible. Ye fácil pescanciar que nun quiera marchar. Nun ye cosa de medrana irracional sinón de que a naide-y presta empobinar camín desconocíu. Y asina, basniándose pela vida de dolor y narcóticos, falamos de lo divino y lo humano.

En realidá, la muerte nun debería ser estorvisa pal entendimientu de la esistencia pero ye evidente que los vivos durmientes nun se tomen esa pasera en seriu hasta que, como diz la copla 13 de Jorge Manrique, “desque vemos el engaño / y queremos dar la vuelta / no hay lugar”. Y nestes circunstancies ún nun pue facer otra cosa, razonable, qu’acompangar al doliente, al enfermu, al amigu o collaciu.

Puesto que’l camín siempre ye personal,  nun ye que los demás sobremos sinón que podemos ser pilancu si nun se tien cierta perspeutiva humano. Pa enfrentar esti acontecimientu, como cualuquier otru, lo meyor ye llimpiar la mente de la basoria mundano supérfluo, de toa esa “supercadarma” que vamos aperiando, pasín ente pasu, alrodiu de supuestes necesidaes supuesta, ya ineludiblemente, necesaries. Ye la imaxe del home arrecostinando el sacu piedres del que nun quier prescindir pol so muncho valor, mientres enfila’l traxe de madera.

Ta claro que nun ye necesaria parafernalia dalguna pa morrer. Camudar d’esistencia nun ye dalgo estraordinario pues llevámoslo faciendo dende la creación del cosmos. Sabemos que ye parte del ciclu de la materia-enerxía y nada que faigamos va a camudar el resultáu del procesu. Mas, sabiéndolo, nun va a ser menos verdá qu’hai formes de vivilo y, ente eses alternatives, podemos escoyer la más afayaíza personalmente. Hai unos díes l’home, con pánicu a morrer, confesaba que sentía que colaba d’esti mundu mientres xacía en cama. Acostáu, taba nuna paz prestoso, y viose avanzar nuna especie de pasillu, un túnel, y que nun sentía dolor pero, al ver el crucifixu na pared, arrepintióse y pidió nun marchar tovía. Y nun marchó.
Y ye que tenemos derecho a alministrar el nuesu tiempu d’estancia na fonda de la vida.

Tenemos ciertu marxe de maniobra. Pero teníendo too eso, tamién ye cierto que cuando apinemos la copa de la vida cola cabera llárima, la cabera sorrisa, el caberu besu o dispidida, enfilaremos esi camín que pa unos ye a nenguna parte y, pa los que saben, ye camín d’entornada a casa.

Si queremos una vida sano, que val dicir muerte sano, llimpiemos primero la mente siguiendo los encamientos d’esti personaxe qu’encarna Nick Nolte na pelicula “El guerreru pacetible”. Solo tenemos el presente. Cuidémoslu.

Lo cotidiano insensible

Puesto que l’estáu normal del humanu ye’l de durmiente, digamos tamién, el del caleyar pela vida baxo ontrol automáticu, nun lleva xera pescanciar que lo cotidiano, por selo, desapaez del puntu de mira críticu del home non consciente. Damos por fecho munches coses, ente otres, que somos inmortales. Pero, por embargu, más allá de lo cotidianu hai tou un intramundu, una interminable recatafila  de causes, amestaes unes a otres, que costrúin el destín de toos nós. Ye como una cadena d’aparente infinitu, con miles y miles d’arcoxos que representen los intres de la vida nos que, les más les veces, dorminos el sueñu de corderu propiciatoriu. Esti cachu peli ye un exemplu de lo cotidiano tamién invisible.