CONGU: La maldición de la riqueza

Hestoria del arrampuñe que sufre el Congu (anguaño, República Democrático del Congu) cuntada por un testigu, Bernard Kalume Buleri, famosu cantante congoleñu que fexo fama per Ruanda. Esti reportax emitíu pola canal ruso RT trescala sentimientu y emoción. De la manu d’esti sufríu negru vemos parte de la hestoria moderno del Congu, y vamos, a traviés de les viviencies del protagonista,  dende la independencia del país a les matances de Hutus y Tutsis en Ruanda, de la riqueza de la colonia (masque durante ella los negros yeren meros esclavos del propietariu del territoriu y país, el rei belga Leopoldo II) a la esclavitú de la miseria d’anguaño. Un país ricu en fontes minerales (cobaltu, cobre, coltán, diamantes, estañu, uraniu..) que sufre la paradoxa de la llamao “maldición de la riqueza”, productu de la corrupción político y les munches guerres interesades que se fain al abeyu de los porgüeyos de les grandes corporaciones tresnacionales que dominen los mercaos de diamantes y minerales estratéxicos. Mui interesante.

ESPAÑA, PARAÍSU DEL LLADRÓN. Cómo ye'l lladroniciu y qué téuniques empleguen

Esti videucartafueyu de Sinfiltros.com amuésamos los últimos métodos qu’usen los asaltantes d'inmuebles pa españar les peslleres. España ye, anguaño, paraíso pa los lladrones, cada día más organizaos. Les estadístiques del INE dicin que nel 2016 en Madrid, cada día, robaron en 42 viviendes, y en delles comunidaes autónomes se fain cásique 2.000 robos al mes. Interesante reportax. Robáte en casa ye fácil.

TRESPORTE MARÍTIMU Y MEDIU AMBIENTE: La contaminación atmostérico pantasma

Nun solemos decatar de que los barcos son fuente de contaminación atmosférico ablucante. Los primeros que lo noten son los veceros de los puertos nos que carguen y desembarquen, llugares nos que les malures de polmón y alerxes guarden estrencha rellación cola actividá del tresporte marítimu, como amuesen los diversos estudios de la O.M.S. (organización mundial de la salú). Nun vemos cuánta polución atmosférico echen estos lleviatanes que son l'espinazu de la economía mundial, pero ye cosa de cuidase d'una contaminación que, en xunto, suma la produción contaminante d'un país talo qu'Alemaña, Esti cachu reportax fala d'ello y de los porgüeyos que tienen les naciones con bandera de comenencia de siguir emporcando l'aire cola sida de que nun se-yos toque'l negociu de la esplotación de la marinería, los ingresos por fletes y la impostura de barcos vieyos y pelligrosos navegando ensin control mundo alantre.

EL MUNDU DE LES DROGUES PSICODÉLIQUES: ¿Portal divín o camín de velea?

Reportax alrodiu del usu de les drogues llamaes "psicotrópiques". Hai xente que fai cultu d'estes drogues por afirmar que tienen un conteníu más trescendental que adictivu. Opinen antiguos consumidores, fabricantes y médicos. Frente al LSD (ácidu llixérxicu) agora tan de moda otres drogues "naturales" tipu l'ayaguasca o la coreteya de la Mimosa osiris, planta tropical, de les que se saca la DMT o dimetil triptamina. Nel reportax se fala del conteníu espiritual del "viaxe" psicodélicu.

CARTAFUEYOS DUNEDIN: L'adolescencia problemático

Ya viemos un resume d'esti cartafueyu o informe, no que cincaba a la violencia femenino. Equí va completu, refiriéndose a los problemes na adolescencia y a los posibles tratamientos iguadores tempranos que permitiríen evitar futuros criminales o seres antisociales. "PREDIZ MIO FUTURU: la ciencia de nós" ye una serie de videocartafueryos que ponen n'imaxe los dixebraos cartafueyos/informes Dunedin.

VIOLENCIA CONYUGAL FEMENINO: Un asuntu amazcarao

Esti cachu del documental "PREDICT MY FUTURE: The Science of us" tien un conteníu interesante. Trata del orixe de los problemes antisociales de l'adolescencia acordies col cartafueyu/informe DUNEDIN que fai un estudiu de tipos d'adolescencia problemático. Sicasí, l’informe DUNEDIN (http://dunedinstudy.otago.ac.nz/publications) amuesa y esclaria,con datos incontestables, un asuntu sorprendente qu’incomoda al feminismu y a los siguiores d'esa relixón: el fechu de que les muyeres son tan violentes, sinón más, que los homes, y que los maltratos femeninos pasen desapercibíos pola mor de la presunción de ser víctima en cuentes de verdugu. Amás d'esto, énte un maltratu familiar o domésticu de mano ye l’home el perxudicáu, presu y condenáu mientres elles queden impunes por un sistema penal inxusto. El feminismu, anguaño parez más cerca de ser una ideoloxía totalitario qu'un movimientu de defensa de la muyer. Na siguiente entrada del blogue va el videu completu

ALRODIU L'ASPEUTU MILITAR DE LOS DRONES

Esti videu presenta la revolución de los drones, especialmente na so faza militar.

XENÉTICA Y SOCIOPATIA. ¿Hai xenes “malos” qu’amalen a la xente, o mala xente con xenes amalaos?

Ésti documental ye perinteresante. Neurobiólogos y xenetistes hai tiempo que trabayen a comuñes pa identificar los raigaños biolóxicos de los comportamientos humanos. Pero esto nun ye cosa nuevo. Ya a finales del sieglu diecinueve y entamos del venti, dellos estudiosos buscaben na fisionomía y morfoloxía de los individuos la predisposición, o xustificación, de comportamientos antisociales y/o criminosos, lo cualo llevaría a procesos euxenésicos tarrecibles en sociedades aparentemente madures y "civilizaes" como la sueca o la alemana y estadounidense.

Agora ye l’estudiu del xenoma lo que parez dar rempuesta a estos comportamientos “diverxentes”,  falándose de “factores” neurobiolóxicos qu'entemedien nos vezos antisociales qu’espeyen tracamundios de personalidá. D’esti mou, alxudíquense determinaos xenes a comportamientos, lo cualo parez llevar a ciertu determinismu que xustificaría comportamientos automáticos y, poro, llibres d’imputabilidá y responsabilidá. Asina, fálase de la rellación ente maltratu y comportamientos violentos cola disfunción del xen “MAOA”;  del xen 5-HHT, responsable de la rempuesta humano emocional a nivel de l'amígdala cerebral; del xen COMT, rellacionáu cola esquizofrenia y la rempuesta química inducío que lleva a ésta al comprobáse que pue ser moduláu por aciu l’usu tempranu del cannabis. Dalgunos aína aforfugaron pa etiquetar a estos xenes como “dañibles”, pero la cosa nun ye tan evidente nin tan automático. Tener un xen d’éstos nun produz irremediablemente, comportamientos sociópates. Tan per entemedies dellos factores. como 'l mediu ambiente en que ún desendolca, l'ausencia o presencia d'amor maternal, una bona educación, una sociedá estructurao. Esti reportax ye perinteresante pa evitar los prexuicios y dexa abiertes munches ralures peles que calistra el llamáu “llibre albedríu”.

DRONES: PERSPEUTIVES Y REALIDAES

L'abeyón, que diríemos n'asturiano, tien insospechados usos, tanto civiles como militares. Esti videucartafueyu nun recueye l'usu que fai la guerrilla irregular en tolos escenarios de griesca, como pasa nos frentes de guerra del mediu oriente d'anguaño, 2017, sobremanera n'Afganistán y Iraq-Siria nos que ye normal ver a terroristes usar drones comerciales como el Parrot, Ghost GoPro o el Focus FPV. Recordando que ya cinquemos esti asuntu en páxines anteriores, tanto n'ochobre del 2014 cono en payares del 2015, ta claro que los drones vinieron pa quedáse ente nós.

....Y INXAMÁS COLARÉIS DE LA PROBEZA, DEXÁI EQUÍ TOA ESPERANZA

Si a la entrada del campu d'esterminiu nazionalsozialista d'Auschwitz ta la fras:"Arbeit macht frei" lo mesmo podría dicise cuando vienes al mundu fuera de la tribu de los ricos y poderosos. Eso de "el trabayu faite llibre" del campu concentración en realidá significa: abandona la esperanza de nun ser probe. Como muncho tendrás lo mínimo pa sobrevivir siendo l'esclavu del sistema que t'alimenta na esclavitú. Sí, trátase d'una matriz d'alienación al estilu de la película "Matrix", un movimientu económicu que perpetúa la esclavitud antigua camudándola pola paradóxica esclavitú "en llibertá".

Esti documental (que garré de la canal ruso RT) del 2015, dirixío por Katharine Rand "LA GRAN DESILUSIÓN" (que bien podríemos entitular la LA GRAN ENGAÑIFA) amuesa la burlla del supuestu progresu humano no económico por aciu un sistema que llamamos "capitalismu". Cierto que nun ye tanto el sistema como los homes que lu remanen lo que fai qu'el repartu de la riqueza seya inxusto y sangrín. Pero esto ye tan vieyo como l'home. Nel videucartafueya desplícase cómo ye que menos del 1/% de la polación tenga más riqueza que'l 99% restante. Una engañifa de la que nun parez poder safáse ya que tolos caminos que llevaríen a desfacer el cáncanu económicu qu'aprovecha a los poderosos, tan trancaos. La esperanza, como siempre, tará na revolución personal y nel entendimientu de que la caxa de madera que tendremos ye de mui poca capacidá. En realidá nada traemos y nada mos llevaremos, pero ye una pena que tanta xente nel mundu tenga que sufrir por esta inxusticia y engañifa económico. Habría más que dicir, pero pa eso meyor visitar esti enllaz que pue dar dalguna rempuesta de freba trescendente.

DE LA GLORIA A LA TRAICION: ISAAC PERAL

La entrevista que-y fixo el periodista Iker Jiménez, nel so programa televisivu "CUARTO MILENIO" a Javier Sanmateo Isaac-Peral, descendiente d'ISAAC PERAL, inventor del submanrín, cola sida de la presentación del so llibru: "El submarino Peral: de la gloria a la trición", (n'ediciones Ágora) ye reveladora de les miseries d'una España cainita. Los porgüeyos de los Estaos Xuníos de Norteamerica, que na dómina d'Isaac quería espurrir el so poder económicu y militar pel caribe, polo que-y fuñía la presencia d'una España (con puxu militar y político amorrentante) en Cuba y Puerto Rico, y los de la Gran Bretaña, que veía nel submarín un pelligru real pa la so marina hexemónico, fueron los finxos nos que s'aperió un edificiu de tracamundios, mentires y traiciones. Amestando a esto l'aliñu de la corrupción de políticos y militares a sueldu de Gran Bretaña y l'usu del mercader de la muerte Basil Zaharoff (espía a sueldu de los EE.XX y Gran Bretaña, con intereses na industria armamentístico), asina como el gabitu de ciertos miembros de la masonería española ya tenemos fecho el desafueru de los cásique ocho sabotaxes que llevaron l'inventu d'esti gran español a la escura de la hestoria. Interesante radiografía d'una dómina pa recordar siempres. Recomiendo una visita a esti enllaz del submarín

MEYOR A TIEMPU QUE RONDAR UN AÑU. De l'amor y del ciñu

L’amor. Esa emoción misterioso. Nesti casu garro el capítulu 3 de la sesta temporada de la finada serie “El Mentalista” pa recoyer esta reflesión alrodiu del desamor por nun aprovechar les oportunidaes, o nun saber usar los tiempos. La cosa va d’asuntos tan vieyos como el mundo: nun llegar a tiempo o nun atrevése a llanzáse a la piscina emocional. De xuru que más d’ún alcuerda d’esos intres de la vida nos que nun s’atrevió a facer dalgo que podría tener sío importante finxu nel camín de la vida. Pasó esi momento y tienes tola vida p’adentálo silente en reconcomía. L’amor tien eses coses tamién. Na serie, el mozu y la moza tuvieron a puntu carambelu pa xuníse antanu, pero el coste d’elleición qu’ello traía nun quinxo asumíse. Depués el tiempu brinda la oportunidá pa igualo. Pero nun siempre ye asina.  Aprovechemos los tiempos.

NORCOREA: dictadura hereditario

Esti cachu de vídeu actualiza la información de la serie  capítulos que ya punxéremos en febreru del 2015 nes páxines d'esti blogue entitulaes "Norcorea: L'infiernu na Tierra". Esti videucartafueyu desplica los antecedentes y biografía de l'aristocracia de los Kim

Foto de satélite qu'amuesa la probeza llumínico de Norcorea, evidente

 preba del estáu de miseria enerxético en que vivi la polación

EL MAL ESISTE. La historia de Mao Tse Tung

Esta serie de videucartafueyos recueye la historia de ciertos personaxes históricos y actuales teníos como arquetipu de la maldá. De xuro que pa dellos esta xente ye prestoso y exemplu a siguir. Ye lo que hai na collecha humano. En xunu del añu 2013 ya punxi una entrada entitulada: "Na galería d'infames y tiranos, Mao tien xustu acomodu"  que pue espurrir información sobre esta velea humano.

EL MAL ESISTE. Bin Laden y compañía...

Ya viemos dalgo d'esti terrorista na entrada d'esti blogue del añu 2012 entitulada  "La povisa d'esti boldre. La llamuerga d'Afganistán na miopía USA". Agora esti videucartafueyu nos fala de la evolución del mal. Y ye que'l mal tien abondes cares y non siempre frutu de la probeza material o mental. Bin Laden ye arquetipu de cómo un tipu privilexao por fortuna, nacencia y educación escueye, en méritos d'una supuesta relixosidá, ser lo más dañible posible pa esparder una mentalidá medieval esclavista. Darréu vieno la magalla de siguidores neso de prauticar el terrorismu islámicu corando a enemigos y infieles. La enfermedá mental islámico xubida a los altares de la irracionalidá totalitario. Nada nueu na casa del home.