VIOLENCIA FEMENIN

La vieya hestoria de muyer interesosa que prime el bolsu d'home amorosu ta que, ensucho de cuanto-y pue zucar, lu arreflunde cuala vieya pelleya de serpiente. Ocurrió n'Australia. El mozu gastó perres en xoyes y lluxos pero nada foi abondo. Darréu parez que-y sobraba el tontu y quinxo sacalu de la so vida regalada pela vía fácil: denuncialu por violencia doméstico pa metelu na cárcele y quedase con casa, coche y demás. Los homes como preses de "feminazis" que se diz agora. Mángo-y sotítulos n'inglés

MIEU Y CONTROL DE MASES: PORQUE DIOS TE AMA

Esta reflesión del mozu Sheldom tien más miga qu'un panchón de boroña.

CONSEYOS AMAÑOSOS PA CRIAR FÍOS BILLINGÜES

Dando un paséu per YouTube atopé el sitiu de SuperHolly, una simpática norteamericana que vivió en Méxicu munchu tiempu (paga la pena ver cómo entamó nesto del español) y ye billingüe dafechu. De fecho prestó-y tantu la vida hispanoamericano del país azteca que casó con mexicanu y agora da clases perinteresantes d'español pa norteamericanos y inglés pa hispanos. D'ente los videos que tien esbillé esti que fala del billingüísmu de los fíos, y alcordeme de los xabaces antiasturianos que nun conocen enducía en combatir la oficialidá de la llingua asturiano. En fin, el videu fala del billingüísmu español-inglés pero ye esportable a cualuquier idioma. Que vos preste

Y aprovecho pa xubir el videu n'inglés iguao colos subtítulos que-y pongo

ASOLEYANDO SECRETOS DE LA XENÉTICA HUMANO

La canal "Arte FRANCE" trai esti documental que se punxo na TV española "La2". Fala de los  nuestros secretos na herencia xenético, de  nueves decubiertes alrodiu la espresión de los xenes. Interesante masque, pa min, ye evidente que los humanos somos dalgo más qu'un paxu d'ADN. Cierto qu'hai dello determinismu pero tamién qu' hai muncha llibertá. Amás, lo importante nun son los xenes que te toquen cuando te train al mundu, sinón lo que fais con ellos durante la vida que tengas.

"DIOS", ESO QUE TANTO ESMOLEZ A DELLOS

"Dios" ye una cosa abstauto y esmolez a dellos. Dalgunos maten nel so nome, que tien munchos. Equí garro un cachu esbilláu d'un vieyu film d'ispiración "cristiano", "¡Gods Not Dead! del añu.2014, que tien  interesantes reflesiones y amuesa cierta manipulación de sentimientos y datos. Pero arreblagando perriba la cosa panfletario, tan del gusto norteamericano, ye un cachu illustrativo del enfrentamientu ente el teísmu y l'ateísmu. Na película atopámonos cola afirmación d'un profesor que diz que “dios nun esiste”. ¿Daveres, hom? Esta aformación opera como un axioma y, neto que talo, nun necesita demostración. Pero ye la cosa que nun se tien d’afirmar, o negar, lo que bramente nun se sabi o conoz. Dafechu que se “pue” facer eso, pero si lo facemos mos lleva a inconsistencia llóxico. “Dios” ye un meru “Conceutu”, o seya, una representación astrauto d’un ensame atributos convenientes o necesarios pa quien los críe, en resume: artefactu humano, una costrución del home. Si se quier, ye una “idea” nel sentíu platónicu pero eso nun la fai “real” o “esisente” en términos de territoriu, masque sí lo seya en términos de mapa. Podemos concebir a “dios” como un mapa que pretendiera espresar tou un territorio y que, poro, nunca dexará de ser una representación o copia d'un territoriu cuestionable y cuestionáu.. Lo dicho: nun se pue afirmar o negar, llóxicamente, lo que nun se conoz o se sabi. Ye posible qu’esista y caún pué tener una idea o imaxe, mesmo un nome, pa llamar a “eso”. Y nun importa la mio opinión: toos puen tener la de so, que será la importante pa caún. Sí tengo claro que’l conceutu de “dios” (que, como dixi, nun ye “dios” como territoriu) ye poderosu, inspirador, pero curtiu y insuficiente pa espresar lo que podría ser LA realidá cabero. La costruición de “dios” ye humano abondo y, poro, llimitao. La frase llatino “causa causae, causa causati” ye apropiada pa finar esta curtia reflesión.

TRAILER

NOTA: Hay un refritu de la película, del añu 2016, col mesmu títulu

TRIBUTU AL DR. MICHAEL NEWTON

En mayu de 2017, la rede de terapeutes del métodu conocíu como de "VIDA ENTE VIDES" del istitutu "THE NEWTON INSTITUTE" (TNI) aconcellaron nel estáu norteamericanu de Maryland  ("la tierra de María", n'honor a la reina Enriqueta María de Francia, muyer del rei Carlos I d'Inglaterra) nel Centru d'Arrequexamientu y Conferencies "Bon Secours", asitiáu en Marriottsville. L'enfotu del conceyu yera proyeutar al futuru el llabor del Dr. Michael Newton, fallecíu nel añu 2016 y descubridor d'esta hipnoterapia bramente revolucionario.. Esti vídeu ye'l tributu que se-y rindió al fallecíu la primer nueche del atopu. L'orador foi Peter Smith, presidente del TNI dende 2009, y terapeuta australianu. Foi un alcuentru gozosu y de persones especiales, por una razón especial, xente que trabaya a comuñes col finxu de llograr esparder un camudamientu global de la concencia por aciu l'emplegu d'esta estraordinaria y podersa forma d'hipnoterapia espiritual llamada, como dixi, " de Vida ente Vides". Los miembros del TNI lleven darréu esti trabayu en más de 40 países, continuando el llabor qu'entamó nel so día el Dr. Michael Newton, emburriaos por un fuerte códigu d'ética espiritual y baxo les bendiciones de Michael; tou ello col aquél d'espurrir y facer xorrecer lo qu'elli traxo al mundu.

Nesti videu inxerí los sotítulos n'inglés, que tan xeneraos automáticamente a partir de la voz, polo que de xuro qu'hai fallos de consistencia pero permiten calistrar meyor lo que se diz. Espero que vos preste. Ye posible que los torne al asturiano, pero ye cuestión de tiempu facelo. Ya veremos.

RECUÉRDOVOS LOS ENLLACES A BLOGUES QUE FALEN DE LA OBRA DEL DR. NEWTON:

• EL DESTÍN DE LES ALMES
• 
  
• LA VIDA ENTE VIDES
• 
  
• MEMORIES DEL ALMA
• 
  
• LLIBRU DEL MÉTODU D'HIPNOSIS

MATEMÁTIQUES CREATIVES...¿O SON OPINABLES?

La babayada que soliña el respetu incondicional a les opiniones pué tener consecuéncies risibles. El respetu ye una cosa y la estulticia otra. La dictadura de la tópica lleva a la necrosis de la democracia, a la so dexereación en forma de la qu'Aristóteles ya anunció: la oclocracia. Respetemos a la persona pero non, necesariamente, les sos idées. Nun hai qu'almitir la dictadura del "buenismu". Hai qu'emplegar la razón xunto col corazón.

En clave irónico se fexo esti videu, Alternative Math, que fai xirigoncia d'eso que se llama "tolerancia de lo opinable", cáncanu que progresa dende les files de lo "políticamente correuto". Púnxe sotítulos n'asturianu al vídeu, masque s'entiende perbien l'aición que desendolca. Que vos preste

THE SHADOWS: APACHE versiones prestoses

Andaba en cata de los acordes del canciu de los Shadows, "Apache" y atopé el vídeu del canciu en guitarra de cuerdes d'aceru tocáu por Doug Beaumier. Prestome abondo y equí lu traigo, pero....

... pa lo de los acordes meyor el vídeu de la versión de José Churruca.

"VENDEDORA GOSTOSA" N'ARMES DE MUYER

Nesta caxigalina de la canal brasileño RedeTV faise una "brincadeira"o broma. Amosar que los homes son más simplayos que'l mecanismu d'una ceriella nun ye difícil. Nesti casu una moza rebeza, de curtia falda, enseña paxareta y culín prestoso, toa una "provocación", qu'asina entitula el vídeu el programa: "Vendedora gostosa provoca os homens". Les compañeres de los mozos engardien cola moza neto que gata tuexa, supongo que por miéu a perder al so home. Nunca foi tan illustrativu vender muebles....Bona bromada, que nun lo ye tanto. 

"FAKE NEWS" O L'IMPERIU PUTIN

Esti videu fala de cómo entamó el xaréu de les noticies falses o Fake News . Tou parez ser un intentu del gobiernu rusu que parasita Putin para sobrevivir al éxitu del so poder omnímodu. Dixebra y vencerás, diz la vieya sentencia bélica. L'esbarrumbamientu de la URSS sacó a la lluz la mafia de los xenerales y coroneles rusos, los auténticos dueños de la Rusia d'anguaño.

YE ROCK ALEMÁN PERO...

Na peli alemana "Der Tunnel", del añu 2001, atopo un canciu de rock bien prestosu que, cómo non, ta n'alemán y la cosa ye que nun soi topalu enteru.

Afitada la peli en fechos reales, cunta la hestoria de xente del Berlín Este que quier fuxir a la zona Oeste masque hebia toa clase de pelligros y pilancos na raya que dixebra les dos zones del Berlín del añu 1961. Y depués de que consiguen pasar al Berlín occidental combaléchense pa facilitar la fuxida d'esposes, maridos, amigos, familiares. Colar d'un paraísu socialista tarrecible acordies colo que sabemos güei.

En fin, esti ye'l cachu....

Al fin atopé el canciu orixinal: Popocatepetl-Twist - Caterina und Silvio

....y como bonus, esti videu de Caterina sola y en Méxicu....y.......

......y con Bing Crosby faciendo un amestao de cancios de la dómina: en dos pallabres: A BLUCANTE,

LA BOMBA ATÓMICO DE PALOMARES

Esti videucartafueyu de la canal televisivo “Historia” apurre nuevos datos alrodiu la bomba atómico cayía n’aldega española de nome Palomares, na provincia d’Almería. La desclasificación de della documentación sobre esti llamáu “socesu” desplíca algunos datos del desendolcu de los acontecimientos.

WTC 911

Mark LaGangas WTC 911 Video

"NUN S'ACUTE A UNA NENA". TERRORISMU FEMENÍN INFANTIL EN SERIE ADULTA

Homes y muyeres. Muyeres y homes. Tanto monta, monta tantu…. Un mundo feliz nun diba selo si la única humanidá posible fuera partenoxenético o clónico. Lo que fai interesante a la especie humana ye, xusto, el caltener dos puntos de vista de la esistencia (y poro, del mundu) emocional y sentimentalmente dixebraos.  Sí, puéque si baxamos a la cosa de la hormona lo etérico esvaneza pero ye induldable que pertenecer a una especie biolóxico con dos posibilidaes d’adeprendimientu etolóxico y biolóxico ye una suerte. Pero nun vamos engañamos: la humana condición ta bien llueñe de valorar esto. La inxusticia y la faltosidá cuchen el camín de la felicidá.

El primer pilancu de la violencia sexual lo vivi el nenu cuando decátase de que nun pué defendese de l’agresión d’una nena. Esto costitúi un principiu "cadarmáticu" o "estructural" na discriminación del home frente a l'agresión femenina. Un, “nun s’acute a les nenes” o, “hai que les respetar masque te dean”… frases que dexen a los nenos “a los pies de les yegües” por dicilo fino. Les muyeres truñen escontra l’home diciendo que ye cosa malo de nacimientu; que la violencia ye cosa d’ellos, que’l mundo diba ser meyor si elles mandaren. Duldo permuncho esto: si dependiera de la muyer la humanidá seguría arrequexada na cueva, (non de Platón) masque, eso sí, baillando tola tribu “el corru la pataca”.  Dalgo que bien pescancien delles filósofes o pensadores como Camille Paglia, Beauvoir o Badinter. Y podría espurrir más, pero veamos, con humor, esti cachu de la serie norteamericano “Sheldon nenu”. Ye’l capítulu 17 de la temporada primera. Unos guionistes xeniales que dan pié a una reflexión más serio que divertío. Veilu

SHELDON NENU (Big Bang Theory) Y DIOS

Nel capítulu 11 de la primer temporada de la serie "Sheldon nenu" (Young Sheldon)  hai una divertida parodia de lo sagrao o trescendente. El diañu y lo divín inviten a cuidosa reflesión, too ello visto dende los güeyos d'un guaje resabiáu. Hai que reconocer que los guionistes de la serie son xeniales. Mángovoslu pa que lu disfrutéis.

CATALUÑA, ADICTA A FRANCO, PRIVILEXADA POL FRANQUISMU

Depués de la griesca incivil española de 1936 el Plan de Desendolcu que fexo el gobiernu de Franco invirtió el 40% del dineru presupuestáu del I.N.I. (Istitutu Nacional d'Industria) en Cataluña con la factoría SEAT a la cabeza. Un 20% fue a Vascongaes, otru 20% a Madrid y lo que quedó espurrióse pel restu d'España. El despegue económicu d'estes zones foi rápidu tres la postgriesca pero non asina nel restu d'España, amiseriada dafechu. Con razón la burguesía catalana adoraba a Franco, esi home. Agora los nazionalistes catalanes arrenieguen del so bienfechor. Paradoxes de la vida. Esti vieyu vídeu del NODO ye rescamplante.

Esto ye una verdá incómodo pa los neofascistes catalanes de cuñu totalitariu. Veamos dellos puntos de vista nestos vieyos vídeos de la falanxe y de noticiarios europeos

THE DAY I GOT MY AK-47

“Un día de xuliu de 2017 contraté a un ex axente de les fuerces del orde de los Estaos Xunío pa mercar un fusil d’asaltu AK-47. Compré per entemedies d’Internet y quedé nun sitiu pa recoyelu. Fuimos a la polación de McAllen, ciudá qu’espurre al traviés de la raya ente Texes y Méxicu. En Méxicu el nome de la polación ye Reynosa, llugar nel que se llibra una llucha mortal ente los cárteles de la droga Zeta y Del Golfu. Dos díes dempués pagué 600 dólares nun aparcamientu enllenu xente. Quien mos lu vendió nun lu conocimos. L’arma ye irrestrexable. Too llegal acordies cola llexislación norteamericano…. Pero el negociu daveres ye la muerte de miles de mexicanos”.

 

Asina entama esti reportax entituláu “The day I got my AK-47: Guns, Mexican drug cartels and US laws”. Nun fai falta saber inglés pa pescanciar el mensaxe d’esti negociu de muerte. El presidente norteamericanu, Donaldo Trump, quier facer una muria que dixebre, físicamente, USA de Méxicu pa evitar el pasu de xente pero de xuro qu’esa murian nun va a ser pilancu pa que les armes d’USA sigan viaxando a Méxicu. La mio esperiencia con fusiles automáticos reduzse al vieyu CETME C del exércitu español, agora recalibráu a munición winchester-307 y capáu a semiautomáticu.

EL DILEMA DE LA INDEPENDENCIA INFORMÁTICO D'EUROPA

La independencia, la dixebra, se gana. MICROSOFT ye una corporación multinacional que furrula como un monopoliu a nivel d’empresa de software: el so sistema operativu, Windows, ye hexemónicu, y el so paquete ofimáticu MS Office tamién. Esti reportax alemán emitíu por Rusia Televisión invita a reflesionar alrodiu del anubrimientu qu’esiste nos modos negociales que se desendolquen ente la empresa Microsoft y los gobiernos europeos y también de la Unión Europea. ¿Por qué hai tantu secretu? ¿Por qué nun se pue conocer el dineru públicu que se gasta en beneficiu d’esa empresa? ¿Por qué lo público ta soxulgao polos porgüeyos privados d’una multinacional norteamericano que comparte enfotos colos servicios secretos d’Estaos Xunío? Demasiades preguntes… y muncho dineru camudando de manes en casa de políticos presuntamente corruptos

El software llibre tien muncho futuru pero parez que poco presente. El exemplu de cómo palmó el proyeutu Molinux de la Comunidá Autónoma Castellano-Manchego, y el proyeutu guadalinex de la Xunta d'Andalucía parecen bonos exemplu de lo mucho que falta pa que'l códigu abiertu seya una realidá granible, polo menos n'Europa.

LA FONTE DE LES MUYERES (La source des femmes)

Prestome esti film belga de 2011, y fíxolo abondo. Solo pude garrar un cachu na canal española La2, y darréu algamé la película completo pero ensin los sotítulos de cancios d'homes y muyeres, asina qu'edité el videu y amesté la parte con sotítulos al orixinal que nun los tenía, y quedó mui amañoso. El tema desendolca nel mundu medieval que ye, anguaño, la morería. Trátase del agua y de les muyeres que tienen de dir buscala pa trayela al pueblu porque esa ye la tradición: la protesta d'elles por esi llabor y el chantaxe sexual que fain a los homes pa que'l gobiernu de la zona meta l'agua n'aldega (esto recuerda a Lisístrata  o "La griesca de les muyeres"). Pero hai muncho más qu'eso nel dubiellu argumental de la película. Se fala de la intolerancia relixoso, de lo barrenaos que tan los islamistes y del usu de prendes que desfilen les formes y cara de la fema. Prestoso ye'l puntu vista femenín d'esa cultura que tien a la muyer más como un oxetu de posesión que como suxetu de derechos. Tarázola en 3 cachos pola mor del pilancu de nun poder xubir de 100 megues los vídeos. Podría baxar inda más la calidá de la imaxe y facer solo 2 entregues pero nun diba prestar el resultáu agamáu. Que vos preste la peli.

LA FONTE DE LES MUYERES 1/3

LA FONTE DE LES MUYERES 2/3

LA FONTE DE LES MUYERES 3/3

HESTORIA D'EVENS: LA RAYA ENTE HAITI Y LA REP. DOMINICANA

Nesti videu de 2014, la canal catarí "Aljazeera" pon finxos nel problema que tien la República Dominicana cola vecina república d'Haití. Tituláu "The crossing", espéyase el desastre humanu d'un país sapozáu na corrupción y probeza (Haití) frente a la relativamente próspera R. Dominicana, cincao ello dende'l puntu vista d'un estudiante haitianu, Evens, que tien de caleyar muncho camín pa pasar la raya y aportar a una escuela dominicana ú podrá educáse y tener más oportunidaes de progresu personal y económicu. Una islla, La Española, con dos naciones y dos mundos económicos bien dixebraos. Sabemos qu'Haití foi el primer estáu n'algamar la independencia na zona americana, y además d'ello, el primeru nel que la negritú foi quién a lliberáse del xugu esclavista, nesti casu francés. Pero d'aquello primero nun vieno nada bono pa la polación prieto que solo camudó d'amu: d'esclavu del home blancu francés a esclavu del home negru con poder. Nun hai pior pina que la de la mesma madera.

Dende'l satélite, la frontera ente estos dos países ye evidente pola deforestación que fain los apobrecíos haitianos pa facer carbón vexetal, pero les dixebres ente estes dos realidades polítiques son rayes más fonderes de lo que deberíen ser por ocupar un mesmu ámbetu ecolóxicu y económicu. Tal se diría que los prietos nin supieron, nin saben, gobernáse o tienen permala suerte. Dafechu, curioso ye.

"Al jazeera" ye la forma n'inglés de la pallabra árabe que significa "la islla" y n'España hai una polación con esi nome: "Algeciras".

EL PRECIU DE LA XUSTICIA O LA PROBEZA COMO NEGOCIU.

D. Francisco de Quevedo y Villegas escribió hai más de 350 años un romance inmortal: “La pobreza. El dinero”. Una de de les sos estrofes diz: “¿Quién con su fiereza espanta /el cetro y corona al Rey? /¿Quién, careciendo de ley, /merece nombre de santa? /¿Quién con la humildad levanta /a los cielos la cabeza? /La Pobreza.

Esti reportax del añu 2016 cinca un conceutu que podría interpretáse, de mano, como púramente éticu o moral (la xusticia o equidá), pero equí se piñera pela ciencia de lo económico. Falamos del preciu de la xusticia, lo que cuesta al sistema social humano les desigualdaes económiques que lleven a la mayor parte de la polación de la Tierra a una neo-esclavitú que pué resumise nuna pallabra: PROBEZA. Hai regles dixebraes pa unos: los ricos, y pa otros: la imensa mayoría d'humanos que finen siendo probes. El reportax ye rescamplante nel esamen del procesu de toma de decisiones que lleven a esti mundu económico y socialmente inxustu. Y lo bono ye que siempres foi asina. La entruga a facése ye: ¿hai solución a la desigualdá? Sabemos quién paga el preciu de la inxusticia: los probes, pero ¿quién pagará pola xusticia?

Como siempre, los durmiyosos –la mayoría de la xente- permanez narcotizao énte los políticos, esos preciosistes xugadores de la pallabra falaguero y  engañifa social, guardianes y abellugadores de la élite lladrono, l’auténticu poder na solombra que gobierna un mundu d’esclavos. Nesti enllaz  The Price of Fairness  del Massachusetts Institute of Technology se pue lleer un estudiu matemáticu alrodiu del preciu de la xusticia –o equidá- dende’l puntu vista económicu. Pero dende un puntu vista trescendente, ayenu a consideraciones puramente materiales, too ta bien. Ye raro, sí,  y dalgún día espurriré sobre ello.

LO QUE NUN SE CONOZ NUN S'AMA: JAVIER DE BALMIS

Francisco Javier de Balmis y Berenguer (Alicante, 2 de avientu de 1753 – Madrid, 12 de febreru de 1819) foi mélicu militar español, ciruxanu real na corte del rei Carlos IV. Foi l'encetador d'una espedición mélico pa vacunar a tolos ciudadanos del imperiu español escontra la viruela. Convenció al rei de facer una espedición que pudiere protexer a los súbditos (ello ye, a tola xente del imperiu) d'América y Les Filipines. Aquello llegó a conocese como la "Espedición Balmis" y foi tou un finxu na hestoria de la melecina. El méritu foi enorme. La humanidá qu'amosó España pa colos ciudadanos de les provincies o virreinatos ye increyible y desconocía pola propaganda inglesa escontra d'España. ¿Imaxináivos a un inglés ricu y mélicu del rei arriegando salú, fortuna y vida pol bienestar de los amerindios colonizaos?
    L'agüelu de Darwin, Erasmus Darwin ((1.731-1.802) dixo nun discursu ante nobles ingleses: "Nos mios viaxes pel grande imperiu español quedé almiráu de cómo los españoles traten a los indios pues fainlo como si fueren los sos semeyantes, incluso formen families mestices y llevanten pa ellos hospitales y universidaes. Conocí cabezaleros y obiespos indíxenes y hasta militares de rangu, tolo que fai qu'hebia paz social, bientar y felicidá en xeneral que ya quinxéremos pa nós nos territorios que con tantu esfuerzu vamos arrampuñando a los españoles. Les sos señoríes tendríen de comparar esto cola política de despolación y esterminiu (que facemos los ingleses) ya que, dafechu, la fe y la intelixencia española tan costruyendo, non como nós que facemos un imperiu de muerte, una sociedá civilizao. España ye la sabia Grecia, la imperial Roma, frente a Inglaterra, que ye'l corsariu Turcu".

Gracies, España.

1900 - 1914: TIEMPU D'AMORIOS

Amorios, o seya, vértigos, dibilluriu. Tiempu de tracamundiu. Una nueva era taba enxitando y vinía de la manu de la teunoloxía, el llamáu "progresu", l'inxeniu humano aplicao a lo bonal que diría, seliquino, esboligando pa lo anubrio. Un nueu orde taba riscando nel horizón humano. Esta serie francesa desplica perbien el periodu de la historia previu a la Primera Griesca Mundial, primero de saber qu'eso diba a producise. Tiempos de cambéu. Prestosa perspeutiva que mos traxo fasta equí la canal española, La2.

¿ANUNCIES O TE COÑES?

Les fabes tienen freba y....

NEO-MONXARRATOS: Los censores de MOVISTAR SERIES

Esto de qu'hebia xente siempre dispuesto a cudiáte pa que nun te condergues al infiernu, o que vixilen que nun peques, o que piensen que son ellos quienes saben, meyor que tu, lo que te convién ver, o oyer, o esfrutar...  Sí. Hai xente que considérate un infante de teta, dalgo asina como un maliguáu físicu o sensorial. Un tontu. Vaya, vaya, vaya...

Los mozos de la canal MOVIESTAR SERIES fain bonos a los vieyos censores de cuando 'l franquismu se cudiaba de que los españoles nun vieren coses males en cine y televisión. Sinón ye porque me presten ver les series, tamién, na versión orixinal de xuro que se m'esmucía esti detalle que vos pongo. Véi y creyéi... y veréis el porqué de la risión de la muyer. Trátase del capítulu 6 de la segunda temporada de la serie norteamericano "The good fight".

La muyer que fexo a Mussolini: Margherita Sarfatti

Esti programa de la serie "Documentad2" de la televisión española La2 trai un reportax francés que finca al rodiu de Margherita Sarfatti, la muyer que fexo, d'un escuru y ramplón políticu, un estadísta. Mussolini y el fascismu tienen muncho en delda con esta persona y el reportax fai prestosu analís de la hestoria d'esta rellación sentimental qu'arreblagó perriba de los convencionalismos de la dómina. Non escaezo la importancia de la la muyer fuera de familia rica y de sonadía.

PARÁSITOS DEL PRESUPUESTU. ¿FUNCIONARIOS Y POLÍTICOS?

Los políticos son un cáncanu, afirma la tópica al usu. Los funcionarios, parásitos: nun trabayen. ¿Ye verdá? Ya vemos lo que son dalgunos políticos que tan nos medios de comunicación empozaos en procesos xudiciales de grande sonadía y lladroniciu. Pero, ¿y los funcionarios? Esti reportax emitíu pela canal de televisión española CUATRO  alrodiu los emplegaos públicos (términu qu’inclúi a funcionarios, personal llaboral y personal directivu al serviciu de les alministraciones publiques) amuesa la corrupción de ciertos “funcionarios” (toes muyeres, sacante el directivu d’agües de Cádiz, xubiláu) cuando se trata de cobrar y non trabayar, nesti casu na faza de l’alministracion de xusticiu. Lo simpático ye que los sindicatos d’esos trabayaores amparen la corruptela horaria, acordies col xuez que denuncia anónimamente esti xaréu por miéu a esos sindicatos de la función público, que diz que los sos funcionarios nun lleguen a trabayar nin 5 hores al día. Eso desplica, en parte, la llento y desesperante de la xusticia. Nun hai costancia de que se fexere daqué con esta xente pillada “in fraganti” ausentándose del trabayu a les sos deleres.

¿Qué ye pior? ¿Home o muyer? ¿Nena o nenu? ¿Padres o fíos?

Esti capítulu de Gumball ye xenial. Trata de responder a qué ye lo pior cuando yes una persona que cumple un papel biolóxicu na sociedá. ¿Ye pior ser muyer o home? ¿Pior hermanu qu’hermana? ¿Fíu o fía? ¿Y qué pasa col famosu techu cristal que, presuntamente, torga a les muyeres algamar posiciones más altes nel currículu empresarial o social en xeneral? Con humor trátase la inxusticia de ser home o muyer, del techu cristal, de lo aburríu de ser adultu o la sinsustancia de ser infantil. Prestosa reflexión qu’amuesa a una familia alloriada por nun algamar lo que, en xusticia, cree merecer caún de los sos miembros.