¿Pa qué sirve, tamién, un tacón femenín?

Hai teoríes pa tolos gustos y petites. ¿Pa qué sirven los tacones?

Hai teoríes curioses, que despliquen esti artefacto guéi mayoritariamente femenín, como rempuesta a un hestóricu comportamientu motriz de la fema cuando debía dir a pasu llixeru pa siguir al home cazador.

Ta claro, seya como fuere, el contenín intrínsecu d’un tacón tien muncho de sexualización: al xubir calcañu y empeine del pié, s’estiliza ‘l papu de la pantorría y produz un desplazamientu del cadril que mueve p’afuera ‘l culu, compensándose asina’l desequilibriu del carrastiellu.

Asina que, a la entruga de ¿pa qué sirve un tacón? la rempuesta ye evidente nesti vidiu, nel que un podólogu forense desplica la cosa anatómica del desplazamientu del culu.

La Somatización de les emociones

Hebio un tiempu en que la ciencia enfrentaba más milagros y misterios de lo que lo fai anguaño. Ún d’ellos, yera la cosa estraño d’enfermedaes, o disfunciones, que nun amosaben raigañu físicu o desplicación biolóxico evidente o “normal”. Yeren disfuncionalidaes rares, qu’aniciaben d’un día pa otru. Dolores ensin causa. Paralises ensin xacíu. En resume, malures que nun teníen tratamientu médicu dientru de la ortodoxia. Nesti cachu vidiu de la serie norteamericano, BONES, dientru de la usual urdimbre policiaco, trátase un casu de “somatización”, o seya, el d’una emoción non resuelta que surde al mundu físicu en forma de paralís d’una pieza anatómico. La psicoloxía moderno desplica estos fechos como un bloquéu físicu qu’espeya, bramente, un bloquéu mental. El conocimientu de lo trescendente nun da desplicación dixebrada d’esto ya que parte de la base de que tolo que nun se resuelve emocionalmente poles “bones”, tendrá de facese con dolor, poles “males”. Si por cualaquiera causa psicolóxico nun enfrentamos un problema, esi retu permanecerá a la chisva, nel subcosciente, puxando por dalgún tipu de igua. Un exemplu como el d’esti videu ye claro: ante la desvalorización que fai una persona del trabayu d’otra, si esa persona desvalorizada reprime una rempuesta afayaíza pa facese valir ante “l’agresor”, ye dicir,  nun tien “manu derecha” o “izquierda” pa enfrentalo faciendo valir el so puxu personal, provoca una reaición corporal, ello ye, somático, físicamente costatable, nesti casu en forma d’un paralís qu’espeya l’enronchamientu, non igáu, de la emoción na supuesta imposibilidá de lluchar pola propia autoestima.

Nesti casu, el personaxe principal de BONES ye persona fría y bloqueada nel mundu emocional, pero ensin malura psicolóxico. Vivi nel mundu racional como forma de combatir un mundu emocional frayáu por una infancia desafortunada y, poro, cuando xulga a los demas actúa llibre de prexuicios emocionales, en ciertu sentíu, neto que lo faría un autista con cierta autonomía personal. Resalvando la obviedá de la naturaleza ficcional del vídiu, ye interesante la reflesión que fain los guionistes, los cualos se sofiten nel trabayu de gabinetes y estudios psicolóxicos. Como exemplu, val.

El sexu egoísta. Viaxe al imperiu onanista.

Nesti vidiucartafueyu de la serie televisivo “DocumentosTV” de la canal española La2 descríbese dalgo plasmante pa nós: la preferencia xaponeso pol sexu “egoísta” frente al sexu en compañía. Merez la pena decatase de les reflesiones que fain los guionistes del reportax alrodiu de la solitú, el narcisismu y la falta compromisu pa col “otru” nos movimientos de relaciones interpersonales.

Parte 1: L'imperiu de los "SinSexu"

Parte 2: Solitú con silicona a tamañu "natural", y narcisismu escluyente.

Pa espurrir na tema de los xuguetes sexuales, nos Estaos Xunios hai empreses que proporcionen muñeques a tamañu human,en  silicona. Falamos de Real Doll que foi la primer en faceles aprovechando la so esperiencia na fabricación d'efeutos especiales pal cine. Tuvo tanto éxito que propició la entrada nel mercáu d'otres. Hai perbón reportax de la BBC entituláu "Guys and Dolls" que se pué ver por partes en YouTube.

Pelligros de la sobrecualificación. ¿Trai cuenta ser tuntu?

D'un tiempu p'acá, mucha xente con bones notes, currícula espectaculares y maestríes munches, falando idiomes a mamplén atópense lluchando por un emplegu que nun necesita cualificación especial. Nesos casos, dicir lo muncho estudiáu que tas ye un problema pues, dafechu, ta claro que'l trabayaor ye más intelixente que'l xefe. Nesti cachu de vidiu de la serie "LOS SIMPSON" pescanciamos porqué l'hérue de la serie ye tan "tuntu". Dicidió sélo pa evitase chancies y bromades, en suma: mimetizase col mundu "inferior" en que vivi.

Implicaciones anatómiques de la promiscuidá, y poligamia.

La serie norteamericano BONES tien perbonos guionistes. Nesti cachu vidiu, la mocina, doctora Brennan,  alcuentra ñicios anatómicos que lleven a camentar nun comportamientu llibidinosu, o de tuexu crónicu, de la victima. Darréu, la investigación esclariará que l'home prautica la poligamia y, con tres esposes, tien muncho que follar. Poligamia que-y causará la muerte pola falta entendimientu ente les esposes. Veamos el vidiu

Nun hai honor ente lladrones ni ente ex-amantes

L'asesinatu d'un home, a manos d'una muyer, pue tener raigaños diversables. Al final, nun hai honor ente ex-hamantes, acordies con esta reflesión de la serie BONES.

Publicar entrada

¿Cuála ye la edá razonable ente amantes?

Dicin que l'amor ye ciegu. Nun-y falta razón a quien lo diz. Sicasí, hai un rechazu llatente cuando la dixebra d'edá ente los amantes ye bultable. ¿Cuála ye la dixebra d'edá razonable ente amantes, pa que la sociedá bienpensante nun la refugue socialmente? Ta claro que falamos de prexuicios. Nesti cachu vidiu de la serie BONES el psicólogu fai una reflesión alrodiu la tema.

El Cortexu. Ella ye la que quier

Na obra lliterario chino, “El Llibru del Camudamientu”, o “I-Ching”, l’hesagrama trentaiún dedícase al Cortexu. El traductor de la obra, Richard Wilhelm, punxo nesti puntu lo siguiente: “El nome del hesagrama sinifica, en sentíu figurao, influir, provocar. Enriba ta lo sereno, abaxu l’aquietamientu. L’enfotu perseverante de lo d’abaxu incita a lo feble d’enriba, qu'aposienta y. con gayola. fai casu a la incitación. Abaxu ta’l fíu menor y enriba la fía pequeña. Nesti sen, tien de tomar la iniciativa lo masculino y allugáse  per baxo de lo femenino al cortexar”.

Nun sentíu más biolóxico, la cosa pue simplificase como l’aición d’un mecigayu d’hormones, mensaxeros químicos lliberaos acordies col tiempu reproductivu que marquen los ciclos sexuales de fema y machu. Sicasí, hai dixebra ente cómo lo entama l’home, que siempres ta tuexo y, poro, siempres preparao a retacar furaca, o la muyer, que necesita tar na cume de la ovulación, o nuna escitación que necesita confianza abondo como pa desconeutar l’amigdala celebral (que ye’l sistema de sollercia frente al miéu) y el córtex cinguláu anterior (qu’alluga’l sistema de pensamientu críticu y la inquietú celebral).

Nesti cachu de la serie “Bones” vemos cómo una muyer entama la caza del machu “alfa”, desendolcando les artes de cortexu. Lo “normal” ye que seya’l machu el que entame camín pero los tiempos camuden y la fema empicipia a ser, tamién, antecedente de l’aición de cortexu.

¿Cómo escueyen les muyeres la pareya? Perres y Estatus son amores....

¿Cómo escoyer al meyor machu reproductor? ¿Cómo saber cuálu d'ellos va a ser l'elexíu. Amor y sexu tienen un fin teleolóxico mui claro: atopar al machu alfa que fadrá  feliz a la fema

El psicólogu evolucionista David Buss, depués de 5 años d’estudiu alrodiu la preferencia que tién toa triba de muyeres y cultures en materia d’homes (l’estudiu inclúi más de 10.000 muyeres y 37 cultures que van dende l’alemana a la taiguanesa, pasando pola de pigmeos mbuti y esquimales aleutianos) descubrió que, en toles cultures, les muyeres tienen menos enfotu nel atractivu visual d’un posible maríu y más nos recursos materiales y l’estatus social del candidatu a pareya. Esto suena incómoda nesta dómina na que les muyeres emporren pola so independencia social y económica pero, por embargu, los resultaos qu’alcontró Buss son claros: la economía y l’estatus del varón manden más que la guapura y sex-appeal, que nun ye que nun se valoren pero que, sin perres o trabayu, nun dan más que para una fodienda ocasional, y poco más.

Nesti cachu de la serie norteamericano Bones, una de les actrices reflesiona sobre qué home, de los que conoz y se tira, ye’l meyor especímen pal so futuru conyugal. Los guionistes platéen, perbien, la necesidá de que’l machu alfa seya solvente, tanto económica como emocionalmente. L’elexíu, nun fai falta dicilo, tien perres a embute. Veámoslo

Reinu prohibíu

Prestóme la música, y la película nun taba mal del too. Por eso vien equí. Que vos preste

Astur-gremlin y minerismu xabaz, trál laralará, tral lará

Buenos, aquellos mozos de la RTPA:

,

César ta en casa. (L'aniciu del planeta de los simios)

El llibru "El Planeta de los simios" de Pierre Boulle marcó un finxu nel caminu del entendimientu de lo que puede ser un camín evolutivu ensin l'home. La posterior adautación cinematográfico, más o menos fiel al espíritu del escritor francés (por dicilo d'otra miente, la película ye mui malo si la comparamos col llibru, pero respuende a la mentalidá norteamericano de facer cine) permítemos calumbrar un futuru ensin la especie humano como "reina" de la creación. La película de L'Aniciu del Planeta de los Simios plantega un posible orixe a la caída del home dixebrao de la ideya que punxo Pierre Boulle en so llibru. Pero seya esti focicazu de la especie humano por aciu un dexastre nuclear, como s'espresa na novela francesa, o por un corrupiu virus que mos esanicie de la Tierra, la lleción por deprender va a ser la mesma: el pior enemigu del home, ye l'home mesmu o, en términos llatinos, "Homo humani lupus est". Llistos aquellos romanos, sí. Veamos un cachu del final de la peli "Rise of the planet of the apes" que dirixó Rupert Wyatt y que nun pueo contemplar ensin echar una llarimuca polo malos que somos los humanos colos animales, humanos o non. 

Por cierto al final de la peli s'espresa cómo va espurriendo la enfermedá vírico que va matando a la humanidá. Asturies aparez bien a les clares.

Del desamor a la pacencia y esperanza, pasando por echá-y güevos

L'amor nun correspondío tien dao muncha lliteratura y grandes momentos na hestoria humano. Dende guerres mítiques a procesos de divorciu xabaces, el desamor nun conoz fronteres sentimentales, emocionales, xeográfiques, étniques o cualesquiera otres. Masque  bien cierto ye que la economía fai muncho pa que una rellación entame, furrule o muerra. Al fin y al cabo, la llibertá sin pan ye mala de comer. Nesti cachu de la serie norteamericano "Bones" (Güesos) s'encamienta la pacencia y la esperanza cuando la otra persona nun parez dar señales de compromisu sentimental. Lo de los güevos y la pistaloa ye acesorio, pero interesante cuando se trata d'un machu-alfa.

Merecemos la verdá y la honrdez de los nuestros políticos

Esta reflesión del protagonista de la película "Dave, presidente por accidente" ye válida en tou intre y llugar. Y, por embargu, seyendo cierto, pocos políticos tan dispuestos a reconocer que trabayen pal pueblu que-y paga.

La esencia de toa medida llaboral, tamién pal 2012

Nesti cachu vidiu de la película "Dave president", hai una reflesión amañoso pa l'asuntu del trabayu y la necesidá de valorar l'esfuerzu personal. Con independencia de definiciones, ye evidente que l'home necesita llaborar como forma de sentise, como poco, útil a la sociedá na que vivi. Darréu d'ello podremos matizar cómos, cuándos y qués.

Ludopatía: cuando val más perder que ganar

¿Quien nun tuvo, dala vegada, la tentación de xugar a dalgo? Bien en solitú o en compaña, se xuega pa ganar, pero’l raigañu psicolóxico del xuéu ye más la incertidume de la ganancia que l'actividá en sigo. Si nun sabemos desencorvar de  la descarga hormonal d’adrenalina que produz la incertidume del movimientu de xugar, esa sensación puéa tomar el guía de la vida. Ya vimos na entrada d’esti blogue sobre les obsesiones y compulsiones dalgo de lo que lleva a dalgunos a un camín poco deseyable. Nesti cachu de vidiu tratamos la ludopatía dende una perpeutiva humorístico. Esta escena de la serie norteamericano BIG-BANG ye prestoso de ver y amuesa con humor lo que, pa dalgunos, ye un infiernu.

Ver blog

Homenaxe a MEDIUM. Esbilla del capítulu caberu

Alcuérdome de que, cuando s'inaguró la primer temporada de MEDIUM n'España, la canal de televisión, CUATRO fixo muncha propaganda y anuncia de les bondaes de la serie. La verdá ye que una de les virtúes de la mesma foi facer "plausible" la esistencia d' "otres" "realidaes". Nesta materia, más que lo que te dicin ye la esperiencia personal lo que val. Poro, utilizar les capacidaes humanes d'introspeición, reflesión en silenciu y busca interior trai grandes frutos y conocencia, tanto personal como del mediu en que vivimos. Convién reflesionar, masque seya por similitú que, neto que nun vemos l'aire, lu alendamos, o neto que'l pexe nun ye quien a dixebrar l'agua na que vivi d'otres realidaes "pexeres" pues forma parte de la so esistencia vital natural, hai muncho más de lo que se "ve" nel mundu que se vivi.

Daveres que podemos cuestionar tolo que mos pete, y creer no que caún crea pero, dafechu, el creer o non lo facer nun ye más que fechu suxetivo que tien muncho d'opinión y relixón personal y, poro, ye dalgo irrelevante a efeutos de lo que ye, o non, verdá en términos ontolóxicos. El creer ye una relatividá y como talo, discutible. Sicasí, nun se m'escapa que cuando ún quier, se pue pasar de "creer" a "saber". Dicho lo cualo, les más les veces lo importante va a ser conocer lo que "sabes" más que lo que "crees". Esta serie televisivo prestome muncho y, poro, mángovos equí una esbilla del caberu capítulu.

La povisa d'esti boldre. La llamuerga d'Afganistán na miopía USA

Nesti cachu final de la película "Charlie Wilson's War"  se dan pistes alrodiu la llamuerga Afgano na que ta metío mediu mundu. El cachu peli entama durante una incursión al suelu enemigu, d'una escuadrilla d'helicópteros d'ataque soviéticos, Mil Mi-35 (nome OTAN, "Hind") Aquí se relata la primer vez na que la guerrilla muyaidín fai usu de los arreflundecohetes " FIM-92 Stinger" que-yos dieron los USA por aciu la collaboración paquistaní, baxo la misión encubierta "operation Cyclone". Veámoslo:

Cuando la xente de Bin Laden baltó les llamaes  “torres ximielgues” o WTC (Centru Mundial de Comerciu) en Nueva York, l’orixe de la muerte y destruición taba mui atrás nel tiempu. Paradoxes de la vida, too entama colos vieyos enemigos de la guerra fría, los soviéticos, cuando aportaron a Afganistán en sofitu del gobiernu revolucionariu de turnu, lo que permitía a los soviéticos siguir col sueñu de los zares d’alglamar una salida xeográfica a les agües más caldies del océanu índicu. Cola aída al gobiernu de Mujamad Tarik y de Nayibulá, los soviéticos espurríen la so influencia na zona, faciendo pinza cola India, sobre la República de Pakistán, potencia nuclear amiga del antiguu amigu chinu y, d’aquella, incómodu vecín pa la URSS, col que teníen frecuentes engarradielles na frontera cola Mongolia prosoviética.

 

Esta película, basada nos fechos reales de la vida del congresista norteamericanu Charlie Wilson amuesa cómo los United States of America armaron a los muyaidines con armamentu amañoso como pa forzar, en nueve años, la salída de la URSS d’Afganistán, pero fueron incapaces d’invertir en meyorar la vida del pueblu, colo que aforrando poques perres, dexaron el campu llibre pa que xubieren al poder los “Talibanes”  y otros movimientos islamistes xabaces entrenaos polos norteamericanos na guerra escontra “l’infiel” y “atéu” soviéticu. Los norteamericanos metieron la patuca y traxeron la desgracia tanto a Afganistán como al restu del mundu y too, sigún la película, por aforrar les perres de facer escueles y carreteres.

Pues espurrir información nesta entrada del 3 de xunu del 2017 entitulada  EL MAL ESISTE. Bin Laden y compañía...

L'Orixe víricu del cáncanu

Al entamu del mio currículu científicu el cáncanu (cancer, n'inglés)  veíase, única y esclusivamente, como dalgo d'aniciu xenético. Cuando estudiábemos el sarcoma de Rous o el de Kaposi, s'intuía que los daños nel ADN yeren los responsables de la falta de control nel espuxigue celular. La falta d'inhibición por contautu ente membranes y d'apoptosis, o muerte programao, dicíase que yera una falta de comunicación ente l'ADN y el complexu de traduición d'aquél a proteínes funcionales, por aciu los ribosomes. Sicasí, dalgunos estudios yá apuntaben a virus como'l "Fagu-T" como responsables de la cancanización tisular. Esti resume esbillao de "La Nueche Temático" de la canal española La2 abri la puerta a los científicos que caltienen que l'orixe de dellos cáncanos son infeiciones víriques y/o bacterianes. 

¿Tetes o témpores? El poder de la mamiella

Esti vidiucartafueyu que punxo la canal española La2, nel programa "DocumentosTV" y tituláu " "Mamielles, un valor engrandando", alrodiu de les mamielles, ye interesante. Dalguna reflexión hai que trayer, masque lo meyor ye dexar que la xente espurra les filies y fobies qu'ello-y pua causar. De toes formes, un bon reportax tien filies, fobies, espertos y militantes de toa triba. Nesta imaxe hay una moza que ta escontra les tetes, 3 espertos y el resto ta contento colo que punxo. Hai premiu si sois a dixebrar a estos personaxen de la tira cómica

Darréu mángovos el vidiucartafueyu dixebráu en 2 capítulos pa que la carga seya posible.

PARTE 1

PARTE 2

Sexu na campaña de la nada

Simpática foto de lo que ye elexir ente peste y malaria

Ma, namái una... (y tuvo de tocáme)

La figura maternal na especie humano resume en sigo tola sabencia del xéneru femenín. Conoz de les artes de seleición "selectivo", del amor interesoso y del amor incondicional. Too ello alliñao cola sabencia remanaora de quien conoz la neurona masculino y, poro, algama tolo que quier por aciu la sabia mezclienda de psilocoxía inverso y tensión sexual. Nesti vidiu de la serie Big-Bang, una ma vien a rescatar al fíu del mal d'amores, con gracia y inxenio. Pretosa reflesión de lo que ye, y lo que sabi, una ma. Que vos preste.