Interesante cosa esto de los sueños.

Hai que saber que nun tolos sueños son iguales. Hailos ensin xacíu, que son aquellos que sirven pa relaxar l’actividá celebrar del día que morrió, por aciu de los cualos s’ellaboren paisaxes simbólicos y paradóxicos que lliberen enerxía mental. Hailos d’estudiu y conocencia, aquéllos qu’apurren soluciones a necesidaes. Hailos premonitorios o dirixíos, aquéllos que permiten comunicaciones biunívoques de raigañu.trescendente.
Pero con independencia del tipu sueñu que seya, los sueños train misteriu y maravía cuando yes capaz de trabayalos. Un bon exerciciu ye apuntalos namái esconsoñar, pues ye entóncenes cuando apurren muncha información que trabayar col cosciente, amás del incosciente.. Y ye cierto que cuando se sueña, el sueñu ye la realidá, y lo que tá al otru llau, ye dicir, esto que vivimos agora, nun cuenta ya que ye una llonxana, y desfilada, realidá. La famosa frase de Calderón de la Barca, que paró n’obra rimao sobre llibertá y destín, “La vida ye sueñu”, plantea la paradoxa de qué ye lo real. Si bien hai que dicir que la sostancia de la obra de Calderón que, como digo, cinca a la llibertá frente al destín, ye más pescanciable cuando s’atalanta que llibertá y destín nun son coses dixebraes nin opuestes, sinón consecuentes, una de la otra. La xente tien de saber que’l destín ye’l productu de la llibertá cristalizao nel esname d’elleciones realizaes durante la esistencia, tanto presente como ausente. Pero eso ye fariña que piñerar con más tiempu. Veamos cómo ven l’asuntu del sueñu los guinistes de la serie “Medium”...

¿Hai fame? ¿Qué tal unes fabes de potasprés, y peres al vin?

La potasprés nun ye ferramienta prestoso si bramente quiés quedar como un rei de la xinta saborgoso, cierto, pero aforra tiempu. Y cuando'l tiempu ye escaso, tirar de la la cocina esprés pué solucionar más d'un surtíu. Yo trabayo muncho l'arroz que, en 2 minutinos quédame bárbaro. Sicasí, Arguiñano, nesti vidiu, suxere una bona fabada que, ta claro, con bonos ingredientes tien dequedar de muerte, y non como la ponen nos botes de fabes esos qu'anuncien pela televisión, con una vieya pelleya falando porcanciu castellano, cabo un home mayor: el maríu capáu, y un montañeru esfrecíu con tola pinta d'opositor a babayu neanderthal.

Veamos como fai Arguiñano la fabada, de la que, dacuando, menciona a un misteriosu "Fernando", que nun ye otro qu'un contribuyente al fiscu de la Confederación Helvético, vervigratia, Suiza. Llistu el mozu, sí.
 Y pa postre, unes peres al vin. Diabéticos, asteneivos. Va en dos cachos.

 y, p'acabu, va la otra. La verdá ye qu'apetez metese na cocina si el resultáu ye tan bono...

Orientación llaboral y desesperu

La verdá ye, que ye difícil predicar autoestima n’otros cuando esos otros confiesen rancor pa escontra otros. Les bones pallabres concasen mal col estáu de desesperu. Cuando los nacionales ven a los otros, estranxeros, ocupar puestos qu’ellos mereceríen con prioridá, y te confiesen que con gusto diríen a matar a toa esa gandaya que vieno a esta casa, les más les veces sin invitación; que fai baxar los precios del trabayu porque trabayen pol salariu del esclavu; xubir los alquileres, pues métese tola tribu nun pisu pa poder vivir, (y ello aprovéchalo’l caseru), y qu’ocupen un espaciu llaboral que ye de los d’equí, quédate poco que facer, sacante acompañar la conversa con tópicos neutros y muncho humor. Frente a esta fosca realidá recuerdo les narcótiques semeyes de les publicaciones de la Watchtower Society, eses nes que’l paraísu que viendrá pon a negros y blancos, depredadores y preses, vida y muerte nun territoriu de tolerancia mortalmente aburrío y beatífico, too alliñao con muncha flor y muncha herba verde, muncha canaya, y muncho páxaru esnalando cielu límpido, maxestuoses aves que broquen un espaciu aéreu irreal.

Almitamos que nun vivimos nun mundu perfeuto. Que frente a la tolerancia buenista hai otra realidá que necesita menos buenismu y más realidá. Que la política, l’arte de lo posible, solo la sufren los ciudadanos, non los políticos. Y almitío ello, veamos lo que mos diz un orientaor llaboral tan aburríu de repetir los mesmos movimientos como lo ta’l paráu, el desempleáu en desesperu, que tamíen tarrez les mesmes preguntes, coles mesmes rempuestes. Y veamos la cara que pon el desempleáu cuando’l funcionariu-y pregunta, retóricamente, “¿por qué espera a que dalguién-y dea permisu pa ganase la vida?”.

Yo, de ser el desempleáu, toviére-y retrucao: ”¡Qué dificil ye facer l’amor nun SIMCA 1000!”, siguienda la canción de los inhumanos. Y  diréisme, con rzón: “¿a qué vien esta rempuesta?”.

A que, esti pais, ya parez un SIMCA 1000, ya sabéis, ún d'aquellos pequeños automóviles de la década de 1960, al que llamaben "la chuleta" porque tenía que valir pa 5 persones, y tenía "nerviu" sigún la publicidá de la época. Pues eso, un SIMCA 1000 con mucha xente en cata d’un asientu pa viaxar a nenguna parte y, poro, pocu espaciu p’allegrase’l cuerpu follando a puerta gayola.

Pescando carbón. Piñerando la vida...

Aquella xente que, nes prietes sableres de la mar d'Asturies, pola mor del carbón del ríu  Nalón, xuntaba pa collechar el calor de llar, podría cuntar munches coses. Faltando quien les cunte, mango'l vidiu qu'emitió la productora de programes del Principáu, alrodiu del Nalón. El cachu d'entamu ye impagable. Púnxe-y la música de Nada, aquella que cancia "Ma che freddo fa" N'italiano pescanciase too. El fríu que fai. L'ambetu fríu d'un día buxo, pies espíos y muncha ropa. Leotardos femeninos y esi aquél de tristura que train unes semeyes tan carbonoses como'l sustratu fotosensible de la película de cine "Super 8" que grabó'l cachu de vida.
Viendo les imáxenes de muyeres de toles edaes tirando de piñera pa garrar l'islán, la sable prieto del polvu del carbón, amás de cachos mayores; los paxos y les goxes... Viéndolo, vos digo, daveres amozo. Tempus fugit, cierto, pero il cuore si innalza...

IMPLICACIONES EUXENÉSIQUES: Fimosis y error en zucamientu de paxareta ayena

Los pelligros de la falta de "lluces"

Alcuérdome de cuandu nenu, dir al Hospital del Galipu, que tenía esi nome por nun algamar nin mediu copín de xente trabayando nél,  pa operar de fimosis. Mio pa llevóme en tranvía tiráu por caballos, que llamaben “xardineres” los del país, y alcuérdome de que, depués de tarazame pelleyu y cauterizar la firida, tando tresvoláu polos efeutos del éter, los díes que vinieron fueron tremendosos. Mexar yera sufrencia. Pero vaigamos al cachu película que vos mango. Nesti resclavu, viendo al actor David Duchovny pasar d’hérue de los X-Files a mozu gayasperu en “Californication” con operación mélica de fimosis, masque sía de magullu, pescanciaréis el guión del filme que vos mango darréu. Neses circunstancies de minga n’igua, y en casa grande, ye fácil enquivocar d’habitación y ponese a llamber coín de muyer estraña. Toa una esperiencia ya que, cola minga en mantenimientu, namai queda’l sexu oral p’alliviar la tensión de collacia tuexa. Veilo, sinón, y dicime qué vos paez l’aventura...

Ca ún val pa lo que val, y eso ye lo que se fai meyor...

Cuando yes nuevu, la vida parez un campu de posibilidaes illimitáu. Illimitáu hasta que te decates que nun son tantes les coses que sabes facer bien. Pero bien de bien, nada de chapuces. Pues eso, saber facer bien les coses y saber qué coses fais bien, ye'l principiu de la excelencia. Y nun importa que seyas financieru de guolestrit o pilforra de barriu. Facer les coses bien ye lo importante y, darréu d'ello, vendrá la felicidá pola llabor bien fecho. Y si nun lo ves asina, ye fácil dir tomar pel culu, o a llambelos. Asina lo ve una esteticista de Californication...

Non más de cuarenta...

Un de les coses más sorprendentes d'espuxigar ye el decatase del valor ab-so-lu-ta-men-te relativu d'esa cosa que se llama, tiempu. Cuéntase, que les apariciones pantasmales amuesen, siempre, una edá intermedio, que pocu, o nada, tien de ver cola edá del fallecíu tresformáu en bisarme. D'eso falaré otru día pero esto tien el so aquél ya que, psicolóxicamente, ún nun pasa de los cuarenta, más o menos, nel so ideal cotidianu. Son los otros lo que s'encarguen d'espetate, de xemes en cuando y con mui mal envís, lo vieyu que yes  o lo mal que lo lleves. O ye la bioloxía, que t'amuesa l'acabación de ciertes habilidaes que, primero, parecíen tuyes pa siempres. Mas, sicasí, da lo mesmo. Cuando enfiles al pulgueru pa chucar, vas con cuarenta, y despiertes tovía más mozu, si los alifaces de la vida, claro ye, nun vuelven a recordate que non, que ya tienes unos añinos de caleya. Pero nun importa, ún nunca dexará de tener cuarenta años diga lo que diga la tarxeta d'identificación. Una muyer, velo asina:

¿Y cómo-ylo despliques a un neñu?

Ye dificil qu'un neñu pescancie lo que ye dios, asina que tomé emprestao esta rescamplante definición de lo que ye, o meyor dicho, de quien, ye dios. Prestoso, si

Sic transit...la Guapura.

Hai una llinia invisible ente l'ausencia y la presencia de daqué. Y poco importa el grandor de la frontera de dixebra. Como realidaes escluyentes, son inmecibles. Pero, seyendo cierto ello, hay elementos, entes, seres o conceutos, que xunen los contrarios en sigo mesmo. Pa min, son coses estraordinaries. Y ún d'esos entes, ye la guapura. Luis Eduardo Aute cantóla con maestría y sensibilidá. Oyéila.

Pero guapures hai munches, sigún l'apellidu que se-y ponga.  Otra, la física, espeyada en cuerpos humanos aparentemente mozos per siempres, mueve muches más coses que solo sensibilidá y sotileza. Más, lo sorprendene, ye poder concebir l'atopáse con daquién infeliz por ser guapu abondo. Ún esperaría lo contrario ensin muncho trabayu pero sí, tamién hai xente que desea la normalidá. Como too na vida, ente lo muncho y lo poco hai un términu razonable. Ainda la guapura tien medida. Veamos lo que  mos cunten los guionistes d' esti cachu película de ciruxanos plásticos:

Si too esbarrumba, ¿a ú dir? ¿Ónde abellugar cuando cain piedres?

Dacuando, acútemos el desánimu. Puesto que la experiencia namái puede ser personal, tamién son personales les consecuencies, y les preguntes que se fain nesos intres d’aballamientu interior, de perda de confianza nún mesmu, malamente alguarden rempuesta de los otros. Pero sí, hai rempuestes. Hailes cuando se fain les entrugues correutes, y ún sabe que, daveres, les rempuestes siempre tan aende pa quien les quier oyer. Porque, sí, tan aende, pero hai que dir en cata d'elles al interior d'ún. Ye del interior d’ún, dafechu, d’ú vienen, siempre, les soluciones.
Los de fuera, lo que fain, ye poner música, verbu y compaña a lo que ya sabemos, a aquéllo que conocemos dende siempres, pero que, por inorancia d’ún mesmu, o por falta de vezu, nun atendemos.
Pues ye la vida lo que pasa énte les ñarres mientres enfotamos en saber lo que ye la vida, o fabricar la vida a la medida. Veamos a “Esteisi”, la moza de la peli, querer tirase d'una ponte, fartuca de fracasos, enllamuergada en desánimu y tristura, cuando atopa la solución en boca d'amigu...

Y ye que cuando dexes de preparar el futuru, eso que nun esiste hasta que se llama presente, ye cuando, bramente, vivis el presente. Pues grande verdá ye que namái tienes puxu personal nel presente que vivis. Y  solo cuando dexes d’enfotar no que nun esiste (el futuru), apaecerá lo qu’esiste. “Esteisi” lo diz guapo, nestes pallabres de fin de película americano. Nun planifiques más de lo razonable, y aportarás al destín más llueo.

WALL-Eeeeeeeiiiiiiiiiiiiiiiiiiiiii

Pixar ye mundial faciendo bonos debuxos animaos. Pero con WALL-E algamaron lo imposible: tener a la xente en fierros cuasi durante media proyección, y too ello, ensin una pallabra. Impresionante la sensibilidá y el metallinguaxe de la película. Pero, como siempres, LO MEYOR DE LA PELÍCULA, ello ye, la esperanza d'un mundu meyor o, si se prefier, LA REDENCIÓN DEL HOMO BORRICUS DESTRUCTIVORUS ta espeyao en sitiu esquisitu, apropiao pa la xente con paciencia y sabencia, y mui pocos lo vieron. Neto que na película del xove Sherlock Holmes, en que la xente, depués d'acabar la película -eso creen- sal escopetao dexando tres d'ellos los títulos de créditu y el verdaderu final de película. Eso pasa, tamién, con Wall-E

Na tele punxeron la película estes navidaes del 2010, pero, como fain siempre, tarazaron el filme cuando entamaben los títulos de créditu, lo que va a final de les películes diciendo quién ye quién y quienes trabayaron. Y ye nesi llugar, que siempre sacrifiquen les televisiones, u tá lo meyor de la película. Y sinón veámoslo dempues de tanta tierra ermo, ensucho y povisoso..

LA IMAXE DE LA LLIBERACIÓN

Dacuando, aparez perende la idea de “lliberación”. Gran ayalga ye eso de sentise llibre lo que, bramente, nun ye otra cosa que nun sentir l’estrincón de la correa que, d'esmenu, ya nun espurre más, colo que t’amuesa, a les clares que t’arreya a dalgo o a daquién. Pueque la llibertá nun sía otra cosa qu’otru tipu d’esclavitú, más llevadero y delaxao. Como la felicidá, quiciabes nun ye otra cosa qu’un intre ente l’espaciu y el tiempu d’un glayíu, inabolgable, qu’espurre d’ún, al otru lláu de la vida. Sicasí, nun ye menos cierto que la llibertá naz del tracamundiu, pues l’orde sigui al desorde y ésti muerre n’aquél, arromendando too una xigantesca roldana que xira en pozu ensucho d’agua viviego. Y mientres me pierdo en pallabres, la imaxe del procesu de lliberación sigui nel movimientu d’esti cachu película...