Les 3 regles, como munches otres..

Nun fai falta ser mui aquello pa decatase de que, na vida, too tien regles y desplicación. Les hai "naturales" y humanes pero, nel fondu, regles son. Podemos vivir inorantes d'elles, o non. Podemos seguiles y cumplir el fin que persiguen. Too ello ye parte,  o bien de la llibertá, o bien del so reverso, la inorancia. El guerreru pacetible tien de conocer les normes que regulen el camín que caleya pa que, respetándoles, lo escelso surda del so interior.

Integridá

Ye dificil arreblagar purriba los prexuicios. Ye difícil aceutar al otru talu como ye. Too eso ye cierto. Y seyendo esto que digo cierto, diba ser más fácil facer les coses que son difíciles.

La mente humano ye un continuu tormentu d’idées, prexuicios, camientos y encamientos, ocurrencies, duldes, falancia. Una continua parolada de valeru conteníu, d’inútil adoración polo que nun ye otra cosa que fumu y empanada mental. Poro, cuando se mos presenta énte nós aquello que paga la pena atalantar, aquello que pué traer paz a una esistencia en duelgu, esmuz ente los deos de les entendederes neto qu’agua en manu abierto. Esperamos que la redención vienga de los otros, y que de los otros aportará al alma paz y l’entendimientu.

Bramente, tol asuntu del ser enraigona nun conceutu práuticu: INTEGRIDÁ. Dalgo que se pué formular en forma mui cenciello pero que tien fondura enforma. Digamos que, integridá ye pasar pela vida ensin pisar nin dexar que mos pisen. Y si ello, por causas del destín, trai el fin de la esistencia terrenal, amestaremos a la integridá la medalla del compromisu.

Cuando falamos d’integridá falamos d’un tipu de neutralidá, pero ello nun significa indiferencia o falta compromisu. La integridá, cuando se mantién, permite caleyar la vida pel camín correuto o, si se prefier, el más amañoso pal fin que caún aceutó como base del so adeprendimientu esistencial. Y ye fácil pescanciar que, integridá, nun significa, inmunidá. Una persona íntegra nun va a ser inmune al mundu en que viva, nin s’inmunizará frente a los demás pa convertise n’indiferente. Cumplirá col só camín de vida, con neutralidá de xuiciu. El restu, lo malo o lo bono, vendrá solo.

Nesti cachu vidiu de la vida novelao de Johannes Paulus II hai un exemplu d’integridá. L’oficial alemán que fusilen fexo una escelente eleición. Y non la más fácil. Nesti casu, el preciu de la integridá ye la vida propia. Non ye mal preciu, non. Tampoco'l cura llevó mal premiu.

Al rodiu de la evolución y el progresu

Cuando ciertos políticos, que s’etiqueten de isquierdosos, dicin que son “progresistes”, tendríemos d’entrugamos sobre lo que, bramente, pescancien por eso. El progresu, en sigo mesmo, ye conceutu gaseoso, tan neutru como lo ye’l neutru de materia de la llingua asturiano. Esta xente que se diz “d’isquierdes” fain una espropiación del conceutu “progresu” camudando’l significáu fondero de lo que dafechu ye: movimientu. Puesto qu’esa xente nun evoluciona (ya que sentise d’isquierdes pa ellos ye un fin en sigo mesmo y, poro, considérense que yá aportaron al so nivel d’incompetencia personal) usen el “progresu” como motor de tolo bonal que, dicin ellos, trai lo isquierdoso. Babayos parecen.

Progresar ye movese, y tou movimientu tien, en cualaquiera direición que se considere, dos sentíos. Ambos igualmente neutros y bonales. Poro, cuando oyo falar a los que se dicin “progresistes” nun sé si son “reaicionarios”, “suicides” o “paseantes”. Solo sé que “se mueven” pero nun me costa que seya bono o malo. Igual se mueven p’abaxo. Igual, p’arriba. O fainlo de lláu, que ye menos pecáu. O lo fain como la vaca, que más gorda nun entra en práu. Na mente encaramiellao d’esos humanos con etiqueta d’isquierdes el progresu ye “lo bono” y, lo más importantes pa la corripia isquierdoso, solo ellos, y namái qu’ellos, son progresistes. Lo dicho, babayos parecen pues como talos actúen.

Mángovos esti cachu vidiu que ya punxi notru llugar. Nél s’amuesa la ficción d’un tipu de progresu biolóxicu que fai aportar a un sector de la humanidá a lo más alto de la baxura humano. La evolución, o progresu si se quier, nun tien ínsitu, la marca de lo bonal. Eso ye un pre-xuiciu humano. La evolución, el progresu, solo ye movimientu y ésti pue ser en cualquier direición y valir pa lo que vala. Lo interesante, daveres, ye pescanciar que lo malo o lo bonal que predicamos d’una cosa nun dexa de ser una etiqueta, una guirindola, que mos ciega de ver la realidá talo como ye: inmensa y diversable.

La vida ye, tamién, un menú ú escoyer...

Veamos un fechu, anguaño llastimosamente frecuente.

 Darréu la vida, te despiden.

Depués de la cara tontu que se te pon. ¿Qué fais?

Alcordémonos de que vida ye un menú d'ociones. Siempre podremos escoyer. Quiciabes non el socesu pero SÍ, cómo vivilu. Y, al fin, ye xusto el COMO vives les coses lo que fai que les coses seyan más o menos vivibles y, poro, amañoses d'iguar. Frente a un despidu ún pue escoyer varies poses. Veamos la primera:

 Pero hai xente que prefier esta otra, ye dicir, vivir con esmolecimientu un fechu sobre el que, en realidad ya producíu, nun se tien posibilidá dalguna d'aición. El poder ta nel presente y ye aende ú hai que trabayar la fuerza de l'aición. Llorar o penar un socesu nun val más que pa desafogar, (que non ye poco) pero nun ye forma amañoso d'encaralu.

Veamos la segunda posibilidá:

Tamién hai otra postura.

La del odiu, vengación y dolor. Esi camín ye´l más fácil de siguir pero, nun hai que s'engañar, tamién trai desventaxes. Ente otres, que crea un problema mayor que'l que se quier resolver.

Veámosla:

En realidá, siempre tenemos ociones.

Somos dueños del resultáu de lo que faigamos.

Si la vida mos pon prebes qu'arreblagar, pensemos que siempre, siempre, podemos elexir cómo vivir (y solucionar) un socesu de la esistencia.

Gracies, coca-cola. Tienes bon material

Un mundu ensin culpa

Una de les coses más difíciles de facer, quiciabes porque'l celebru, sigún la neurociencia, nun s'afaya cómodo procesando órdenes negatives, ye'l non xulgar. Asina que nun lo faigamos. Cenciellamente pidamos poder maxinar un mundu ensin culpa. Digo, arrementes y ente comines, "ensin culpa", lo cualo, obvio ye, nun significa, "ensin responsabilidá". Arreblaguemos perriba  definiciones penales y civiles, étiques y relixoses. Equí nun son necesaries.

Ye más fácil de lo que parez imaxinar un mundu como esi. Un mundu nel que los socesos de la vida, toos ellos, nun tengan, o puean tener, un raigañu suxetivu, de suxetu, de psique. Un mundu asina diba ser fácil de vivir pero, ¿daveres lu entenderíemos? Un espaciu d'esa mena, un ámbetu d'esa triba, esiste ente nós y nun ta tan llueñe como parecería. Nesi llugar, les coses ocurren causalmente, como siempre ye y va a ser, pero nun les piñera la mente humano pa pescanciales, clasificales, ordenales y, si nun pue facer nada d'ello, arrequexales na categoría-atroxaderu de lo casual. Si vives coscientemente esi mundu, decáteste, nel intre, de lo natural que ye vivir. Natural, como sinónimu d'harmoniosu. Pero, si pudiéremos algamar esi mundu ¿qué adeprenderíemos? La vida ye munches coses, ente otres, renovación. Dalgunos llámenlo, tamién, evolución. Nun importa el nome mientres quede claro que lo que se formula ye movimientu. Ye necesario que la materia-enerxía fluya y lo ye, non por fatal destín, sinon pola propia realización, finalista, de la vida. Nesi mundu, esto que digo ye evidente y nun hai otra forma d'entendelo. Pero nel de nueso, nun ta tan claro.

Nun conozo toles razones de la vida, ente otres coses porque toi arreyáu al sistema como tolos demás, pero de lo que sé, deduzo dalgunes verdaes que podríen almitise como axiomátiques. Axiomátiques, non porque nun puean demostrase más o menos fácilmente si tuviéremos tola información, sinón porque el facelo nun amestaría más xacíu a lo qu'eses verdades yá amuesen por sigo mesmo, y una d'eses razones de la vida, pa vivila ensin culpa ye la causalidá, lo cualo quier dicir que too, y digo bien, too, tien un motivu y, poro, el socesu que d'ella vien ye dalgo retributivo d'una aición, o omisión, previa. Nun importa cuála ye, el tiempu en que se fexo o les intenciones que la xustificaríen. El socesu naz con independencia de la estocástica.

Pero nel mundu de la culpa, ésti que vivimos, necesitamos de la probabilística cuando nun conocemos (por aparente imposibilidad) toles causes que train un socesu. Nesi mundu, puesto que nun tenemos tola información, necesitamos atopar xustificaciones y combatir resultaos, necesitamos un bon arsenal conceutual de principios que permitan clasificar los productos en información remanable, ye dicir, aceutable al mundu que se vivi. Nociones como xusticia, ética, moral, bondá, etc, (y, tamién, los contrarios) son nececesaries pa sobrevivir pescanciando lo que se considera un mediu real y, daveres, insoslayable.

Escuchaba l'otru día a un reporteru añosu, talludín, bona persona y meyor profesional, esconsoñar concencies na radio nacional, falando de la hipocresía de multinacinales de la farmacopea, de los capitales rapiegos, del capitalismu xabaz, too ello por cuenta la muerte de millones de neños por falta vacunes y xinta. El razonamientu yera impecable, solidariu, éticamente sólidu y, a pocu qu'humanista ún seya, moralmente almisible la crítica pa col sistema que tolera eses muertes. Nel mundu de la culpa, les coses furrulen asina. Y mientres oyía esto sentáu nel cagaderu, púnxime a reflesionálo. Pa min nun hai meyor sitiu pa eso, de la qu'entorno a la natura parte de lo que primero tomé emprestao pa poder siguir vivo. Camenté pa migo, que si nun salía del razonamientu de la culpa nun podría ver más alló, igual que-y pasaba'l periodista y al 99% de la humanidá durmiyoso. Viviendo nel mundu de la culpa, tien xacíu tomar les armes, matar o morir, robar, furtar y, tamién, amar. Nesi mundu, el dolor tien muncho que dicir y enseñar, tien muncho qu'amosar cuando nun se quieren, o pueden, ver otros caleyos amañosos pa les entendederes. Y de la que relaxaba l'esfínter, paiciome oyer una voz que me faltaba polo babayo que yera, al nun ser quién a noxar polos munchos muertos que trai el mercantilismu de les melecines, el de les armes, el petroliu y otres materies primes y ellaboraes, el capitalismu xabaz y una cosa que nun atalanté bien pero que debía ser mui malo y llamase daqué asino como "neolliberalismu"."Un dexastre d'home yes", dicía aquella voz.

Nestos términos, ye difícil facése atalantar cuando les razones que pueas dar, dicir o comunicar nun van sofitar nel mundu de la culpa que vivi toudios. Quiciabes, si pescanciásemos que nun tolo bono que se puea ver como talo ye tan bono como parez, dalgunes coses tendríen más xacíu de lo que paecen tener. Por exemplu, falando de la muerte de los neninos por falta melecines y comida, ¿podríemos almitir que si eso ye asina ye porque tien de ser asina ya que, de nun ser d'esa miente, el resultáu podría ser tovía pior? Nel mundu ensin culpa, la cosa ye congruente.

Veamos l'asuntu en términos de la física clásico. Del fluxu de materia y enería.

Vivimos nun mundu material finito. Esa ye una verdá materialmente irreversible. Nesti marcu, la vida, al menos la biolóxico, s'espresa como tresformación con estrictu respetu a les lleis de la termodinámica. Poro, l'átomu de calciu que forma parte de los mios güesos, vienga del mundu vivu o non-vivu, necesitó una enerxía pa tar onde ta y, lo más importante, cuando ye de mió nun ye de naide, nin de nada, más. Mientres que'l sol ye fonte esóxeno, y principal, de la enerxía de la vida terrestre, la materia (forma grosero d'enerxía) ye cosa llimitao. Aquello que ye de dalgo nun ye d'otra cosa. Poro, aquella materia que se convierte en vaca inmobilízase na vaca hasta que la vaca dexa de selo. Nestos términos, y ensin la esistencia d'un marcu temporal de vida individual, nunes hores tol planeta taría enllenu de formes de vida colo que la Tierra podría vese, dende l'esterior, como un planeta con piel, por dicir dalgo vivo. La forma de vida predominante diba ser del tipu bacteria o fongu, sospecho. Pa qu'esto nun suceda, esiste'l control biolóxicu de la muerte, normalmente en forma de cadena trófico: unos seres vivos se comen a otros, y gracies al aporte de la enerxía solar, aparez un ciclu dinámicu de materia y enerxía vital. Falar de cadena trófico supón falar del binomiu "depredador-presa" y, poro, d'un equilibriu dinámicu que permite diversidá, tresformación y, si se prefier, evolución. Y esto furrula perbién hasta que llegamos al home modernu.

L'home modernu, nel marcu ecolóxicu, carez de depredador específicu. Nestos términos, la polación humano espardería perdayuri, enllenándolo too de materia vivo humano, espropiando tola materia disponible na Tierra, la cuala se convertiría nuna sola especie: la humana. Un dexastre ecolóxico qu'aprobecería la evolución de la Tierra y, lo más importante, furtaría a la intelixencia superior una escuela d'aprendizaxe tan interesante como ye la Tierra. Esto diba camín facese, a la llarga, sinón lo iguara les enfermedaes y malures qu'atoxiguen a la especie humano, y los mecanismos humanos d'esterminiu del otru, digamos la política y la otra cara de la política: la guerra. Nesti sen, la esplosión demográfico humano ye dalgo indeseable pa la ecoloxía del planeta. Millones de nenos muerren col fin de que'l planeta nun muerra. Ensin el control de natalidá que fadría un superdepredador del home, l'equilibriu ecolóxicu de la Tierra depende de la enfermedá y la falta d'alimentos. Si añedimos contaminación y falta de respetu pa col mediu ambiente, la ecuación de la sobrevivencia de la Tierra, por paradóxico que pareza, se cumple. A la llarga, el planeta nun necesita al home pa ser vivible. Y la intelixencia superior nun necesita, solo, el cuerpu humano pa esperimentar la realidá carnal. Quiciabes, frente a la mierda humano, otres formes de vida deberíen tomar el relevu de la intelixencia y el respetu pa cola casa común, que tolo da ensin pidir nada.

Los humanos considerámonos superiores. A los otros seres los llamamos "animales" pero ¿qué otra cosa somos nós? Los animales habiten un mundu relacional ensin culpa, un mundu preordenáu a l'harmonía ecolóxico. Los humanos vivimos esi mesmu nundu pero cola culpa, emplegando artificios conceutuales y materiales que lleven a la destruición del home mesmu y, per estensión, del planeta qu'habita. Pero esto namai tien xacíu mientres la intelixencia superior saque porgüeyos esperienciales por habitar cuerpos humanos. Más, si l'home destrui el mediu d'aprendizaxe, si esbarrumba la escuela en que se forma, si españa los finxos de la intelixencia ¿quién querría habitar un calabre? Daveres que nun m'esmolez que l'home esapaeza. Bramente, somos prescindibles.

Póngovos un vidiu de un gochín. Nun ye’l d’aquél otru de la película “Babe, el gochín arrechu”, sinón el d’una serie de TV. Nun voi negar que velu amoyecióme los güeyos. Esta visión antropolizante d’unos animales que vivin el so mundu ensin culpa, ye daqué falso, emocionalmente falando, pero tien fuerte mensaxe de solidaridá interespecífica. Otru día vos falaré de los supuestos derechos de los animales non-humanos.

Prexuicios. ¿Daveres son necesarios?

Nun tamos tan llibres de faltes y averíes. De pecaos, si vos plaz dicilo asina. L'home ye munches coses, pero sobremanera, animal de "pre-xuicios" y, poro, pre-xulga.

El prexuiciu parez dalgo necesario como ferramienta pa cuidase de lo que nun se conoz de mano. Pero ye tan eficaz alvertidor cuantu esfarrapaor d'esperiencies tamién necesaries. El prexuiciu nin ye bono nin malo, si ye que preferís utilizar esta vieya clave dicotómico. Como too na vida, el resultáu d'esta actitú (esi ye'l raigañu del prexuiciu) depende de lo qu'acompangue al fechu de prexulgar.

Supongo que, como cada home ye un mundu, si el prexuiciu nun va xunto cola sana crítica o con una intelixencia plástico, (aquella qu'arreblaga perriba lo aparente, diendo en cata de lo auténtico), l'home prexuiciosu ye animal peligroso, cimeramente, pa sigo mesmo. Nestos términos, el prexuiciu comportase como lo que ye, una piñera que fai lo propio pa dexar pasar a les entendederes del home prexuicioso solo aquéllo que va tar acordies col sistema paradigmático de creyencies que tien. Un home que va pel mundu con estos, digamos, antueyos colloreaos por prexuicios, ensin dulda va a tener una perspeutiva del mundu daqué distorsionao. Y ello, vuelvo a cabruñar el fierro, nin ye bono nin ye malo, namái una forma de pasar pela vida. Claro que, nestos términos, nun deberíemos aneciar pidiendo a la vida cosa dixebrao de lo que mos dea ya que nós, y solo nós, eleximos el menú que creyer.

Nesti cachu vidiu que vos punxi, que ye un montaxe personal del audiu d'otru vidiu, se fala del AMOR, con lletra mayúsculo. El vidiu trai pallabres que suenen bien, parecen sensates, y aporten con un sabor eclesial, ecuménicu si se prefier, en tou casu trescendente y prestoso al home espiritual. Son pallabres bonales,  enllenes de sabencia, humildá y humanidá. Son, insisto, prestoses d'oyer. Les imaxenes que les caltienen acompanguen perbién el mensaxe y, a nun ser qu'ún tea incómodu cola idea d'un ser supremu, totipotente y totiamorosu, tóo flúi razonablemente pacetible pa una mente común y relaxao.

Pero, darréu, póngovos el mesmu  mensaxe del vidiu orixinal, talo como lu atopé na televisión. Cuando se vea, nun tengo dulda dala de que más d'ún va a tener un prexuiciu que, de nun arreblagalu, fadrái incómodo el velu. Mas, por embargu, el  mensaxe ye'l mesmu, igual de sentenciosu y prestosu.

Va tiempu que los clásicos predicaron que lo importante nun ye'l mensaxeru, sinón el mensax. Que poco tendría d'importar si quien diz una verdá, o una falsedá, ye d'aspeutu sabiu o babayu, ricu o probe. Pero los PREXUICIOS son arma poderoso que, sinón la descargamos a tiempu, mos arreflundirán llueñe d'una esperiencia que podría mui bien ser prestoso, d'una información amañoso o, cenciellamente, tarazarán la oportunidá d'enanchar entendederes o humanidá, por exemplu.

Empleguemos los prexuicios con midida y pa lo que valen: pa dar el primer pasu n'inorancia sabiendo que, el segundu, tien que selo con conocencia. O, muncho meyor: prescindamos de los prexuicios.

Como diz Johannes Paulus II: "Nun tengais miéu. Nunca. Inxamás".