XENÉTICA Y SOCIOPATIA. ¿Hai xenes “malos” qu’amalen a la xente, o mala xente con xenes amalaos?

Ésti documental ye perinteresante. Neurobiólogos y xenetistes hai tiempo que trabayen a comuñes pa identificar los raigaños biolóxicos de los comportamientos humanos. Pero esto nun ye cosa nuevo. Ya a finales del sieglu diecinueve y entamos del venti, dellos estudiosos buscaben na fisionomía y morfoloxía de los individuos la predisposición, o xustificación, de comportamientos antisociales y/o criminosos, lo cualo llevaría a procesos euxenésicos tarrecibles en sociedades aparentemente madures y "civilizaes" como la sueca o la alemana y estadounidense.

Agora ye l’estudiu del xenoma lo que parez dar rempuesta a estos comportamientos “diverxentes”,  falándose de “factores” neurobiolóxicos qu'entemedien nos vezos antisociales qu’espeyen tracamundios de personalidá. D’esti mou, alxudíquense determinaos xenes a comportamientos, lo cualo parez llevar a ciertu determinismu que xustificaría comportamientos automáticos y, poro, llibres d’imputabilidá y responsabilidá. Asina, fálase de la rellación ente maltratu y comportamientos violentos cola disfunción del xen “MAOA”;  del xen 5-HHT, responsable de la rempuesta humano emocional a nivel de l'amígdala cerebral; del xen COMT, rellacionáu cola esquizofrenia y la rempuesta química inducío que lleva a ésta al comprobáse que pue ser moduláu por aciu l’usu tempranu del cannabis. Dalgunos aína aforfugaron pa etiquetar a estos xenes como “dañibles”, pero la cosa nun ye tan evidente nin tan automático. Tener un xen d’éstos nun produz irremediablemente, comportamientos sociópates. Tan per entemedies dellos factores. como 'l mediu ambiente en que ún desendolca, l'ausencia o presencia d'amor maternal, una bona educación, una sociedá estructurao. Esti reportax ye perinteresante pa evitar los prexuicios y dexa abiertes munches ralures peles que calistra el llamáu “llibre albedríu”.