Rendición y llimpieza de mente

Quiero compartir con vosotros una información. Trátase d’un conocíu, home bien portáu y sabiu, non sabicheru, de más p’allá la raya oriental. Un bon profesional del comerciu que vieno a estes tierres cuala tolina perdía qu’enroncha en sablera salmorioso, camín de la otra vida. Un cáncer nel sistema dixestivu lu tien atoxigáu nesi ínterin ente lo deseyable y lo ineludible. Ye fácil pescanciar que nun quiera marchar. Nun ye cosa de medrana irracional sinón de que a naide-y presta empobinar camín desconocíu. Y asina, basniándose pela vida de dolor y narcóticos, falamos de lo divino y lo humano.

En realidá, la muerte nun debería ser estorvisa pal entendimientu de la esistencia pero ye evidente que los vivos durmientes nun se tomen esa pasera en seriu hasta que, como diz la copla 13 de Jorge Manrique, “desque vemos el engaño / y queremos dar la vuelta / no hay lugar”. Y nestes circunstancies ún nun pue facer otra cosa, razonable, qu’acompangar al doliente, al enfermu, al amigu o collaciu.

Puesto que’l camín siempre ye personal,  nun ye que los demás sobremos sinón que podemos ser pilancu si nun se tien cierta perspeutiva humano. Pa enfrentar esti acontecimientu, como cualuquier otru, lo meyor ye llimpiar la mente de la basoria mundano supérfluo, de toa esa “supercadarma” que vamos aperiando, pasín ente pasu, alrodiu de supuestes necesidaes supuesta, ya ineludiblemente, necesaries. Ye la imaxe del home arrecostinando el sacu piedres del que nun quier prescindir pol so muncho valor, mientres enfila’l traxe de madera.

Ta claro que nun ye necesaria parafernalia dalguna pa morrer. Camudar d’esistencia nun ye dalgo estraordinario pues llevámoslo faciendo dende la creación del cosmos. Sabemos que ye parte del ciclu de la materia-enerxía y nada que faigamos va a camudar el resultáu del procesu. Mas, sabiéndolo, nun va a ser menos verdá qu’hai formes de vivilo y, ente eses alternatives, podemos escoyer la más afayaíza personalmente. Hai unos díes l’home, con pánicu a morrer, confesaba que sentía que colaba d’esti mundu mientres xacía en cama. Acostáu, taba nuna paz prestoso, y viose avanzar nuna especie de pasillu, un túnel, y que nun sentía dolor pero, al ver el crucifixu na pared, arrepintióse y pidió nun marchar tovía. Y nun marchó.
Y ye que tenemos derecho a alministrar el nuesu tiempu d’estancia na fonda de la vida.

Tenemos ciertu marxe de maniobra. Pero teníendo too eso, tamién ye cierto que cuando apinemos la copa de la vida cola cabera llárima, la cabera sorrisa, el caberu besu o dispidida, enfilaremos esi camín que pa unos ye a nenguna parte y, pa los que saben, ye camín d’entornada a casa.

Si queremos una vida sano, que val dicir muerte sano, llimpiemos primero la mente siguiendo los encamientos d’esti personaxe qu’encarna Nick Nolte na pelicula “El guerreru pacetible”. Solo tenemos el presente. Cuidémoslu.