Viendo esta hestoria de la computadora Programma 101,
d'Olivetti (que, bramente, trata de la propia hestoria del ordenador
ellectrónicu y l’aniciu de la popularización de la informática) alcordéme del
señor Barreiros, aquel mecánicu gallegu que llegó a ser un potente industrial
de l'automoción partiendo de la nada, na dómina de la posguerra incivil
española na década de 1945-1955. Neto qu'Adriano Olivetti, Barreiros tenía esi
conceutu de la industria como dalgo inxerto na sociedá, dalgo con dimensión
humano y non cosa puramente económico y d'esplotación del home por l'home. Per
otru lláu, la hestoria de la división ellectrónico d'Olivetti ya la del mundu
del inventor, digamos “mediterráneu” o del sur d’Europa. Eso de que la xente
"del sur" seya vago, ensin ilusión innovadora, ensin curiosidá
científico, toa esa mena de tópicos qu'esterilicen, a priori, el gran potencial
de la intelixencia humano añerao en tierres d'España, Italia o de la
mediterraneidá en xeneral, ye dalgo que tovía pesa, perpesa, nel incosciente de
muncha xente. Esi prexuiciu, xunto con otros munchos, fai que seyan otros
ambientes los que parezan más amañosos pa que la ciencia teunolóxico xorreza. Cuando
los emplegaos d'Olivetti ven cómo funde la empresa ensin que la banca nin el
gobiernu italiano faiga daqué cosa por salvar lo que yera un gran futuru
teunolóxico na ciencia de lo que güei llamamos "informática" podemos
pescanciar mucho de lo que pasó y pasa tamién n'España con eso de la innovación
y la investigación. Por eso nun lleva xera entender porqué los Estaos Xuníos de
norteamérica, o mesmo nel norte d'Europa Alemaña o Suecia, suelen ser tierra de
promisión y acoyimientu de xente con enfotos de progresu y innovación. La
cultura del fracasu como camín necesario de perfeción, y non de descréditu, ta
por afitase na mente de la xente asturiano, española en xeneral, y de bona
parte de la llamada Europa "del sur". Vei esti reportax en cachos
pola mor del tamañu del vídeu que se pue xubir al blogue.
1/4
No hay comentarios:
Publicar un comentario