¿Bonobos humanos? ¿Humanos bonobos?
La etoloxía animal ye fonte de muncha conocencia útil.
L'estudiu del comportamientu de los primates suel interpolase, ensin munchu
procuru, col del humanu y, dacuando, los enteraos del asuntu suelen esbillar
d'esi estudiu ablucantes concluciones que pretenden desplicar, al menos
evolutivamente, dalgún de los comportamientos humanos d'anguaño. D'ente los
primates, el Bonobu ye'l más estudiáu no que se refier a les rellaciones
sociales que caltienen los individuos d'esa especie. Los estudios dicin que son
una costelación social matrialcal qu'usa la fodienda, ente tolos miembros, como
pegamín social y válvula d'escape na solución de diferendos o problemes
rellacionales intrasociales. Y de too ello, dellos sociólogos y etólogos
s'entruguen sinón diba ser bono que los humanos adeprendieran de los Bonobos no
que cinca a costruyir una cadarma social amañosa qu'evite enfrentamientos y
diferendos sociales y individuales nel mundu humanu.
La entruga que faigo a los etólogos, a los "bonobistes"
qu'aspiren a "bonobizar" la sociedá humano pa facela más pacífica y
prestosa de vivir ye la siguiente: Acordies col resultáu de la evolución ¿por
qué'l monu humanu ta onde ta y el Bonobo sigui siendo un monu feliz? Esta
entruga lleva a otra: ¿Prestaríate dexar de ser humanu pa volvete Bonobu?
Mientres se critica acíbremente la naturaleza violento del
humanu, la patrialcalidá que llevó al enfrentamiento entre tribus y castres
humanes, la guerra, llucha y trafuelgu pola posesión del poder, podemos
reflesionar si ye eso lo que mos fai humanos y, poro, pescanciar lo que nun ye
ser humano. Esi pasáu, esa evolución, mos fixo lo que somos, y tanto ye asina,
que incluso podemos estudiar al Bonobo y sospirar por una socieda na que follar
ente tolos individuos sía tolo que se necesitaría pa iguar tolos problemes de
la vida. Pero mientres estudiamos cómo ser felices y almiramos cómo lo fain
otres especies de primates, la televisión, la calefacción, la telefonía móvil,
el cine, la informática, la automoción, les estrelles, too eso que ye productu
de industria humano, cuntes otra historia sobre lo que ye ser humano y non
Bonobu.
Esti vidiu ye un
bon brindis al sol. En realidá ye más difícil ser Bonobu que home, pues
nun ye tan fácil ser feliz na casa de la Tierra. Abelluguemos al Bonobu del
home y nós, adeprendamos a nun ser Bonobos más allá de lo razonable.
No hay comentarios:
Publicar un comentario