FINCH, un posible final del home

Los "USAnos" tienen munchu enfotu nes películes del fin del mundu. Diría que tienen un lláu morboso alrodiu la muerte, y ello cola sida de ganar perres presentando finales de la civilización. Dende un fríu xelante a una griesca nuclear, dende una malicada vírico a una catástrofe espacial. Nesti casu, la cosa vien pol españíu solar d'una erupción lletromagnético que fraya la capa d'ozono y dexa el cielu de la Tierra enllenu furacos pelos que cai la radición ionizante d'alta potencia qu'esgoncia lo biolóxico. Y un home, Tom Hamks, na solitú de l'esbarrumbe, malpenes sobrevive rapiñando lo que queda d'un territoriu ermu de vida y agua. L'usu d'un volquete pa movése ya ye raro, dao lo muncho que consumen esos mostruos mecánicos, pero va bien pa l'entamu la película. El canciu "American Pie" echa un gabitu pa centrase nel horror del fin del mundu, y la imaxe inicial d'un tapacubos de la rueda d'una xarré, y la d'un carru de la compra tiráu y desfechu, abandonáu al airón sabero, ya adelanta el fin del consumismu, o seya, de lo que parez ser importante al home urbanita d'anguaño: les compres, o el comerciu en sentíu espurríu. Un final bíblicu típicu pa reflexiona alrodiu l'amistá ente home, perru y máquines. Pero tranquilos: siempre mos quedará l'antiguu oeste hispanu de la Alta California.