La eutanasia –bona muerte- ye dalgo polémico. Les más les
veces el diferendo que s’afita ente les partes n’engarradiella tien que ver más
cola emocionalidá que cola racionalidá. La muerte vívese como una traxedia cuando,
dafechu, ye una cosa natural que xustifica la vida y, poro, el desendolcu
natural del orde evolutivu. Darréu d’ello ta el “derechu a la vida” y quién
tien que lu garantizar. Como l’albuertu, la decisión d’entainar la muerte ye
dalgo más personal que social, masque la sociedá tea per entemedies. Ye la
persona implicao quien ha tener la cabera pallabra nesti asuntu y la tribu, la
sociedá, como muncho tendría de respetar una decisión personalísima. Pero como
davezu, hai porgüeyos ayenos a la persona que quier marcháse del mundu o quier
nun tener un fíu; porgüeyos amazcaraos en postures relixoses o de política
demográfica, siempre de raigañu económicu. Nesti casu pongo un cachu d’un film
alemán que cinca’l casu tanxencialmente, pero de forma interesante. Masque la
morriente cole primero de l’aplicación de la so voluntá eutanásica (por aciu el
llamáu “testamentu vital”) l’asuntu de a quien pertenez la vida y el derechu a
quitála en casos de perda de calidá de vida sigui siendo un asuntu qu’invita a
la reflexión. Pueque si na ecuación eutanásico metiéremos l’amor y la compasión
la cosa diba ser menos violento y más esclariao. Una posible rempuesta podría tar nesti enllaz alrodiu del llibre albedríu.
Si quies coses nueves fai coses nueves, dizse al final de la película.
No hay comentarios:
Publicar un comentario