Tengo un amigu qu'anda estos díes peresmolecíu coles curves.
Non, nun ye cosa de muyeres, masque tamién tengamos curves. La cosa va
d'economía, concretamente del estudiu de la llamada "demanda" y de
cómo se representa. Bramente, de matemátiques. Nun digo cosa nuevo si afirmo
que too ye matemátiques. En realidá, too ye enerxía, pero eso nun toca agora.
La cosa ye que les matemátiques, y los sos serviores los matemáticos, tan nel
tueru de munches coses, de munches disciplines científiques o non, de muncha
actividá creativo, económico y funcional. De fecho, los matemáticos son los
reis de los Fondos d'Inversión, les empreses de xuros y de la banca, en
xeneral. Tolos produtos financieros tienen matemátiques, tolos procesos
d'economía "creativo" toquen teoríes de probabilidaes, los
"grandes númberos" y complexes ecuaciones qu'inclúin dende'l númberu
"e" al llamáu "áureu", costruciones ideales o reales con
nomes como Tartaglia, Fibonaci, Newton, Leibniz... Incluso la intelixencia
artificial nun ye otra cosa que eso, una copia matemática de procesos
biolóxicos pasaos pola piñera de la informática y programación computacional.
Pa dalgunos, la ciencia nun conoz d' ideoloxía parasitario.
Y d'ente la ciencia rescamplaría la matemática como disciplina neutro,
aséptico, insípido, incoloro, inodoro.... potable. Pero sospecho que
s'enquivoquen. Nada escapa a la dicotomía bien-mal. Somos povisa estelar,
cierto, pero tamién matemátiques. Nesti cachu de la serie Elementary el mozu
fala dalgo d'ello....
No hay comentarios:
Publicar un comentario