Viaxes p’amburar.
De nun perdonar dalgo na vida, diba a ser esto. Neto que barcos enronchaos en pedreros secañosos, aquellos que nunca nun volverán a recibir l’agua salmorioso de la marea que los reflotará, tan estos humanos vencíos nes aceres.
Al pasu de nueso, guarden silenciu. Pidin ayuda y fainlo llueñe de la profesionalidá del méndigu comeniente. Llueñe del probe o del maliguáu falsarios. Nun te miren. Quiciabes por nun engañar con esos güeyos qu’inda tienen l’arguyu de quien desafió la muerte en chalana d’alta mar, en caleyu de desiertu o barriu de moros impiadosos. Quiciabes pa que nun veamos, espeyaos nellos, a los amigos que vieron morrer, afogaos o afamiaos, nel camín de la Europa prometía. Pueque unes monedes calmen la conciencia d’ún. Pero ¿cuántes fain falta pa facese resistente a la pena?
Persé que caún lleva’l so destín. Que’l mesmo Xesús alvirtió: “siempre va haber probes”. Que somos pingarates chiscando nun mar de necesidaes. Persélo mas, persabiéndolo, esmolezo. Nun tenía perres qu’apurrir, y les palabres nun-y diben dar de comer. Y nun soi tan santu como pa andar nesos zapatos de inxusticia.
A lo meyor toviere de pidí-y perdón. Perdón por tolos que-y vendieron el sueñu de meyorar nun mundu de blancos, de blancos cagüercos con conciencia alquilada a becerru d’oru. Mas, eso nun-y diba dar consolancia nin comida. Y, muncho menos, lu diba agospiar en cama calentino y comida decente.
Taba nel muru del sablón de Xixón. El perru mirólu y yo pasé de llargo. Nun quinxe miralu mientres lloraba’l mio coral. Sé que hai más. Sé que son más. Que tán más alantre. Mos acompangarán, a toos nos, en silenciu. Nada estraordinario pidin. Namái, esistir en dignidá. Y esa la tienen, masque non les perres que-y prometieron los fíos, nesti casu del ex-presidente español Rodríguez Zapatero, aquellos que combalechen colos tratantes de ganao p’apurrir carne fresco al sistema de la esclavitú llaboral d'España.
No hay comentarios:
Publicar un comentario