El círculu virtuosu. Ofensa-Perdón

Ye interesante conocer cómo furrulamos frente a una ofensa, en xeneral, a una agresión. Lo normal ye respondéla, sinón defendese, ya que una cosa asina vívise como delda que saldar o inxusticia qu’iguar. Nun tamos obligaos a ser víctimes a non ser que medien pautos, esplícitos o tácitos, ente víctima y victimariu. Con independencia de les facetes relixoses o filosófiques, en realidá l’intercambiu d’enerxía nun sistema físicu del tipu víctima-victimariu sigui les regles de la termodinámica y, al final, nada camudará, sacante aquello que nun tien medición física y eso ye lo que mos dañará. Nesti cachu película d’spíderman 3, la inxusticia de la muerte d’un familiar esarreya ‘l consecuente procesu  de vengación, como forma componedora d’un mal conceutuáu como inxustu, que se tien d’iguar. La famosa llei “del Talión”, una vida por otra, parez un preciu razonable pero, ¿daveres va a ser un preciu que pague la pena pagar? Énte una situación asina, desconocemos la relación ente la victima y el victimariu; desconocemos toles circunstancies y hai que tener claro qu’una vida, un humanu, nun ye’l preciu d’otru ya que somos únicos. Poro ye que la vengación, como emoción, cuando surde anubre les entendederes, produciendo momentánea satisfación cuando se realiza pero, en realidá, nos iguala, polo malo, col victimariu. La vengación ye como'l traxe negru de la película, un ropax que s'alimenta de lo pior de nosotros pa damos falses fuerza y xustificación. Nesta ecuación de (agresión – vengación = xusticia = 0) toos pierden pues la situación final nunca va a iguar la situación orixinal, ye dicir, “cer0”. Mediremos la perda en términos de desgaste emocional y nueves deldes que pagar nun futuru del que nun somos dueños. ¿Cómo frayar esti círculu viciosu d’agresión-vengación? Pa que l’equilibriu sía perfeuto, hai qu’introducir el perdón. El perdón france’l círculu viciosu: llibera, y perdonar, amás, ennoblez y coloca a quien perdona perriba la miseria humano. Pero hai que pescanciar, tamién, que perdonar ye, más que nada, perdonase. Les más les veces, el vengatible asume un papel que nun-y correspuende, un papel que pué que-y empongan les circustancies pero que, daveres, a la llarga elixe. Eso ye lo que ún tien de perdonase: l’asumir la pose, y/o l’aición, de vengación. Nun somos quién pa perdonar ofenses de terceros. Solo les que son de nós. Hai que cuidase, muncho, de dir pela vida de superhérue.

Puede ser daqué rebesoso pescanciar la ecuación ofensa-vengación-perdón, pero sinón se fai, al final apaecerá la culpa y, la culpa, ye mala comida pal camín de la vida.

El sueñu d'un tuexu, que non d'un texu.

Hai un dichu qu’asegura que la información ye poder. Los más, suelen pescanciar esi “poder” como daqué esterno a ellos, digamos un poder políticu, económicu, social… Ye posible camentalo asina pero, daveres, esa fras fala del poder de la persona, aquél que tá ínsitu nún, l’avenceyáu a la soberanía personal. Cuando uses d’esi poder, amueses autoestima y un ciertu aspeutu de la cadarma biolóxico que te fai como yes, ye dicir, el patrón sexual primariu.

El poder, de manu, nun conoz de xéneru sexual, pero sí que ye verdá que’l xéneru sexual pon llendes al “cómo” s’espresa‘l poder. Y plasma ver cómo el xuéu xenéticu arreyáu al determín sexual del individuu pué facer mui xebrao el comportamientu sigún nazas home, muyer o mediu-pensionista. Veamos un comportamientu peliculeru que nun s’esperaría nuna muyer y que, nel desendolcu de l'aición, llevará a que la policía prinde al verdaderu culpable, un varón. Les facistes vulvares, o coinfacistes, echaríen les pates al aire diciendo qu’una muyer pué ser, tamién, una depredadora sexual. Cierto ye qu’hai síndromes de fame sexual descomanada na casa de la muyer, pero son procesos mélicamente disfuncionales les más les veces (por exemplu, casos d’hiperplasia adrenal conxénito, hiperprodución sistémico de testosterona o xorrecimientu esóxeno d'esa mesma hormona), cuando nun son exerciciu de llibertá. El celébru femenín, col fluxu y refluxu hormonal mensual, evolucionó pa evitar l’enfrentamientu direutu y guardiar l’orde de la tribu, desendolcando meyores habilidaes comunicativas y emocionales que l’home. Y aquelles muyeres de la edá de piedra que potenciaron esi comportamientu ganaron la partida a la selección natural. Igual pasa col temperamentu masculín. Pero dexemos de metemos en fondures, y veamos esti cachu película de la serie “Medium” que cunta un comportamientu que a más d'un tuexu, prestaría-y atopar na muyer. Coses veredes.

Vivir de prestao, o cómo sufrir a lo xole

L’autoestima ye ayalga al empar que prestoso, necesario. Ye más, digo que l’autoestima ye l’entamu del ser cosciente pues, si ún nun se valora ¿quién lo va facer? Pescanciar esto ye sabese nel mundu, pero non nel cómodu espaciu gaseosu de l’ alienidá tópico, sinón nel del yo cosciente, dueñu del propiu destín. La filosofía alemana crió ‘l términu “da-sein”, el “ser-en”, que val dicir, el “tar-equí”, y Heidegger afirmó qu’esto yera la sostancia del ser humanu. Nun digo yo tanto, pero sí que ye cierto que l’autoestima, el yo-equí, el yo-valgo, ye necesario pa sobrevivir a les dictadures de los otros. Nesti cachu que vos pongo, una muyer sufre alcordándose d’un amor perdíu, una relación na que, ella, nun supo afitar la necesaria raya ente’l yo, y el yo del otru. Cuando necesites al “otru” pa tar “bien” tienes un problema de soberanía personal. Y eso ye mala comida pa la felicidá real. La otra, pues comprala a plazos, pero nunca llena. Nun vivas al traviés d’otros güeyos, por muncho guapo que sían, o que t’amen. L’amor ye llibertá, non sumisión.

Les apariencies son, namái, apariencies. Lo bono ta muncho más allá d'ello.

Nun vemos a la persona. Vemos lo que mos pué gratificar. Lo que podemos garrar. El beneficiu o la delda que saldar. Y, por embargu, más allá de la forma ta la sostancia. Nel campu la guapura ye mui evidente. Veamos cómo el paisanu plasma énte una muyer de bandera que foi otra cosa, notru tiempu y llugar. Incapaz de ver que nun ye la forma lo que fai la guapura, sinón el momentu en que se goza lo guapo. Ye como nun ser a deleitáse d'un bon vin por saber que, cuando decantó en bocoi, echó posu y esi posu, precisamente, nin ye vin nin ye cosa saborgoso. Asina les coses, pasamos pela vida cegaratos. Vei l'exemplu...

Vides exemplares: HARALD BERNDT

N’asturiano, dixebra ye separtamientu, en dos estayes, de dalgo. Ye verbu comeniente, o pueque amañoso,  pal mundu informáticu pues funda tol sistema de codificación en dos valores dicotómicos y escluyentes, dixebraos ente sigo: presencia y ausencia, ceru y unu. Mas, esti breve entamu nun quier dir per veredes teunolóxiques, sinón emocionales. Cuando la dixebra espeya na materia humano apaecen sentimientos curiosos. Tráigovos la esperiencia d’un nianu alemán. N’él, reflexo la superación  y l’asunción o autoaceutación de lo que ye ún. Quien sabe, sabe que, les más les veces, la preba que tien d’encarar un “dixebráu” na esistencia terrena nun ye tanto pal que la sufre como pal que la produz o contempla. Los dixebraos son l’espeyu necesariu en que se tien de mirar la sociedá pa nun escaecer que, sociedá, somos toos. Tamién los dixebraos, digamos los diferentes. Vides exempleres, ciertamente.

¿Qué foi de los bonos actores? ¡Alberto Closas per siempres!

Los bonos actores son como les piedres rares: invalorables. Pero non porque nun tengan valor sinón porque nun hay preciu que poner al valor. Sí, ya se que ye un erru común el tracamundiar valor con preciu, pero válamos emplegar dicha equivalencia como tópica de sobreviviencia económico. Xente como Alberto Closas ye impagable cuando trabayaba énte una cámara de televisión, cine o enriba un escenariu, facía carne'l puru conceutu maxinariu. Aquellos grandes, con grandes aquellos...

Veámoslu nesti cachín de película impagable cuando, como embaxaor plenipotenciariu de la España franquista rellata, de mui malos modos, la so defensa numantina de la uva d'Almería frente a los alemanes d'una "doichland" de los años 40 tardíos, con munches perres del plan Marshall

"¡Que nun me pase fame esi coín!", dixo l'amante.

Falar de “facismu” va a ser falar de nada, pues la pallabra tien un usu tan intensivu que cuasi forma  parte ya, d’esa categoría de pallabres llamaes “gaseoses” o tópiques. Sicasí, definiéndola como una variante xabaz de lo que ye intolerancia bederre (la intolerancia nun ye, de sigo, cosa malo), un bon exemplu de facismu ye’l que llamo, “FACISMU VULVAR” o “COINFACISMU”, que nun ye otra cosa que’l facismu con tastu feminista, tan prestosu a isquierdosos y nazionalsocialistes de la España corripia, xente que se diz mui progresista pero que nun diz a ú progresen, si p'arriba o p'abaxo. Esti facismu, cabo’l que podemos llamar “testicular” de militares y militantes, produz grandes intres de gayola por cuenta muncha babayada y tochura. Intres inescaecibles, de bon pasar, viendo lo que fain dalgunos escalagüertos, y dalgunes toches. Y ye que la vida ye más rico que tolo que la imaxinación pueda inventar. Veamos cómo muerre una facista vulvar, militante del onanismu lletrónicu, nesti vidiu pescáu de la canal de TV, Nitro. Pa mexar y nun char gota.

¿España ye un sumiciu? ¿Furacu d'acabación? ¿Marafundiu de probes y cuidosos?

Hai xente que nun creye eso de que la hestoria, de nun aprendela, la repites. Bien. Yo nun tengo que creyer lo que sé. Sé que ye verdá. Lo que pasa ye que les coses hai que les nortiar dende llueñe. Fai falta perspeutiva pa ver tol cuadru. Esi gran cuadru que pintamos ente toos y que costitui lo que se noma esistencia. Esistencia plural y individual. Esistencia, de ser. Si filtramos la información acordies colos petites personales, les creyencies, fobies y filies, tendremos un créu a medida de caún pero, nesti casu, nun esperar que lo que ye un mapa concase col territoriu. Porque los mapes, mentales nesti casu, son, por definición, un averamientu, namái un averamientu al territoriu, qu’espurre grande y inmensu más allá de lo ciegu qu’ún quiera tar. Veamos un cachín de la serie de los Alcántara. Y si, primero de refugar el mensaxe por venir d’u vien, adoptamos la pose neutro, quiciabes más allá de les filies y fobies personales atoparemos un cachu de verdá amañoso pa nun repetir la hestoria.
Sicasí, munchos son los que caleyen pela vida con antueyos de caballería, ensin mirar a parte dala que nun sía la d’alantre. Y asina, desprecien cuanto inoren. Ellos pierden.