NEO-MONXARRATOS: Los censores de MOVISTAR SERIES

Esto de qu'hebia xente siempre dispuesto a cudiáte pa que nun te condergues al infiernu, o que vixilen que nun peques, o que piensen que son ellos quienes saben, meyor que tu, lo que te convién ver, o oyer, o esfrutar...  Sí. Hai xente que considérate un infante de teta, dalgo asina como un maliguáu físicu o sensorial. Un tontu. Vaya, vaya, vaya...

Los mozos de la canal MOVIESTAR SERIES fain bonos a los vieyos censores de cuando 'l franquismu se cudiaba de que los españoles nun vieren coses males en cine y televisión. Sinón ye porque me presten ver les series, tamién, na versión orixinal de xuro que se m'esmucía esti detalle que vos pongo. Véi y creyéi... y veréis el porqué de la risión de la muyer. Trátase del capítulu 6 de la segunda temporada de la serie norteamericano "The good fight".

La muyer que fexo a Mussolini: Margherita Sarfatti

Esti programa de la serie "Documentad2" de la televisión española La2 trai un reportax francés que finca al rodiu de Margherita Sarfatti, la muyer que fexo, d'un escuru y ramplón políticu, un estadísta. Mussolini y el fascismu tienen muncho en delda con esta persona y el reportax fai prestosu analís de la hestoria d'esta rellación sentimental qu'arreblagó perriba de los convencionalismos de la dómina. Non escaezo la importancia de la la muyer fuera de familia rica y de sonadía.

PARÁSITOS DEL PRESUPUESTU. ¿FUNCIONARIOS Y POLÍTICOS?

Los políticos son un cáncanu, afirma la tópica al usu. Los funcionarios, parásitos: nun trabayen. ¿Ye verdá? Ya vemos lo que son dalgunos políticos que tan nos medios de comunicación empozaos en procesos xudiciales de grande sonadía y lladroniciu. Pero, ¿y los funcionarios? Esti reportax emitíu pela canal de televisión española CUATRO  alrodiu los emplegaos públicos (términu qu’inclúi a funcionarios, personal llaboral y personal directivu al serviciu de les alministraciones publiques) amuesa la corrupción de ciertos “funcionarios” (toes muyeres, sacante el directivu d’agües de Cádiz, xubiláu) cuando se trata de cobrar y non trabayar, nesti casu na faza de l’alministracion de xusticiu. Lo simpático ye que los sindicatos d’esos trabayaores amparen la corruptela horaria, acordies col xuez que denuncia anónimamente esti xaréu por miéu a esos sindicatos de la función público, que diz que los sos funcionarios nun lleguen a trabayar nin 5 hores al día. Eso desplica, en parte, la llento y desesperante de la xusticia. Nun hai costancia de que se fexere daqué con esta xente pillada “in fraganti” ausentándose del trabayu a les sos deleres.

¿Qué ye pior? ¿Home o muyer? ¿Nena o nenu? ¿Padres o fíos?

Esti capítulu de Gumball ye xenial. Trata de responder a qué ye lo pior cuando yes una persona que cumple un papel biolóxicu na sociedá. ¿Ye pior ser muyer o home? ¿Pior hermanu qu’hermana? ¿Fíu o fía? ¿Y qué pasa col famosu techu cristal que, presuntamente, torga a les muyeres algamar posiciones más altes nel currículu empresarial o social en xeneral? Con humor trátase la inxusticia de ser home o muyer, del techu cristal, de lo aburríu de ser adultu o la sinsustancia de ser infantil. Prestosa reflexión qu’amuesa a una familia alloriada por nun algamar lo que, en xusticia, cree merecer caún de los sos miembros.

NETSCAPE foi l'entamu

Eso diz esti reportax de la canal "Historia". Masque yo conocí primero MOSAIC..... y la pantalla negro de textu rescamplante esperando que-y punxera un comandu.

JFK primero del atentáu y La bala perdío

Dos reportaxes del National Geograhic alrodiu la muerte del presidente USA John Fitzgerald Kennedy

Hores Decisives:

La Bala Perdío:

L'ECOCIDIU DEL CULTIVU DE LA PALMA ACEITÍFERO

Esti reportax alrodiu del “ecocidiu” que se fai n’Indonesia al esaniciar la selva orixinal o primixenio pa llantar plantaciones d’Elaeis guineensis, comúnmente llamada palma africana d’aceite, o palma aceitera. Esti procesu, dafechu imparable polos grandes porgüeyos económicos que produz a les multinacionales del aceite y los biocombustibles, xunto cola corrupción llocal y  rexonal que consiente la práutica, ta llevando a la expropiación “de facto” de comunidaes agrícoles y la perda de la biodiversidá animal y vexetal qu’alitaba nesos territorios antanu selváticos. L’orangután va morriendo de fame y ye espulsáu del so territorio tradicional mediante la caza. Nel reportax aparez un abogáu d’una fundación “sui xeneris”: la FIBGAR, fundación presidía por un puntu, una tal Baltasar Garzón, antiguu xuez español espulsáu de la xudicatura por prevaricación. Agora aparez como defensor de causes perdíes, promoviendo la xusticia universal pero hai prebes de que esa fundación, que dirixe la so fía, desvía clientes “humanitarios” a la so empresa ILOCAD SL, qu'exerce de bufete d’abogaos y tien intereses más mundanos qu’humanitarios acordies cola información d’esti periódico.  Parez evidente la impudicia d’usar causes dolioses como ésta de la muerte de la selva indonesio pa sacar tayada económico y llavar la cara d’una fundación baxo sospecha. Mas, perriba esta miseria de la fundación, tá el problema del aceite de palma y l'esanicie d'un ecosistema.